މޫސުން ވަރަށްބޮޑަށް ގޯސްވާނެ ކަމަށް ލަފާކޮށް ށ އަތޮޅުން ފެށިގެން ހއ.އަތޮޅާ ހަމަޔަށް އޮރެންޖު އެލާޓް ނެރެފިއެވެ.

މޫސުމާބެހޭ ޤައުމީ އިތާރާ، މޯލްޑިވްސް މީޓިއޮލޮޖިކަލް ސެންޓަރުން ވަނީ މިރޭގެ 19:00 ޖެހުމާ ހަމަޔަށް މެދުރާއްޖެތެރެ ހިމެނޭހެން ރާއްޖޭގެ އެންމެ އުތުރަށް އޮރެންޖު އެލާޓް ނެރެފައެވެ. މެޓް އޮފީހުން ބުނީ އޮރެންޖު އެލާޓް ނެރެފައިވާ ވަގުތުތަކުގައި ގުގުރުމާއެކު ބޯކޮށް ވާރޭވެހި ފެންބޮޑުވާނޭކަމަށް ލަފާކުރެވޭ ކަމަށެވެ.

އޮރެންޖު އެލާޓްގައި އާއްމު ގޮތެއްގައި ވައިގެ ބާރުމިން ހުންނާނީ ގަޑިއަކު 36 މޭލާއި 42 މޭލާ ދެމެދުގެ ބާރުމިނެއްގައެވެ. އަދި ވިލާގަނޑުގައި ގަޑިއަކު 60 މޭލަށް ވައިގަދަވެއެވެ.

މިހާރު ކުރަމުންދާ މޫސުމީ ވިއްސާރައިގައި ރާއްޖޭގެ ބައެއް ރަށްރަށުގައި ފެންބޮޑުވެ، ވައިގަދަވުމުގެ ސަބަބުން ބައެއްކަހަލަ ގެއްލުންތައް ދަނީ ލިބެމުންނެވެ.