ހއ. ގެ ހަތް ރަށެއްގައި ފެންބޮޑުވެ އެކި ވަރުގެ ގެއްލުން ލިބިފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވުޒާރާއިން ހާމަކޮށްފިއެވެ.

އެ ވުޒާރާއިން ހާމަކޮށްފައިވާ ގޮތުގައި މިހާރު ރާއްޖެއަށް ކުރަމުންގެންދާ ވިއްސާރަގައި ހއ. އަތޮޅުގެ ހަތް ރަށެއް ކަމަށްވާ، ހޯރަފުށި، އިހަވަންދޫ ،ދިއްދޫ، ބާރަށް، ކެލާ، މުރައިދޫ އަދި މާރަންދޫގައިވެސް ފެންބޮޑުވެ މީހުންގެ ގެދޮރަށާއި މުދަލަށް ގެއްލުން ލިބެމުން ދާކަމުގައި އެރަށްރަށުގެ ކައުންސިލްތަކުން މައުލުމާތު ދީފައި ކަމަށެވެ.

ހޯރަފުއްޓާއި އިހަވަންދޫ ދިއްދޫ އަދި ކެލާގަައި ބޮޑުވެފައިވާ ފެންގަނޑު އަދިވެސް އެއްކޮށްވަނީ ހިންދާ ނުލެވިފައި ކަމަށާއި އެމްއެންޑީއެފްގެ ރެސްކިއު ޓީމެއް ހއ. އަތޮޅަަށް މިހާރުދަނީ ދަތުރު ކުރައްވަމުން ކަމަށް އެ ވުޒާރާއިން ބުނެފައިވެއެވެ.

ވުޒާރާއިން ބުނީ ހޯރަފުށީގެ ދެކުނު ސަރަހައްދުގައި ފެންބޮޑުވުމުގެ ސަަބަބުން ހަ ގެއަކަށް ފެންވަދެ ގެއް؛ުންތަކެއް ލިބިފައިވުމުން އެ ހަ އާާއިލާ ރައްކާތެރި ހިސާބަކަށް ބަދަލުކުރުމުގެ މަސައްކަތް އެރަށު ކައުންސިލުން މިހާރުކުރަމުން ގެންދަވާކަމަށެވެ.