ނައިބު ރައީސް ހުސެއިން މުހައްމަދު ލަތީފު ފްރާންސްގެ ވެރިރަށް ޕެރިހަށް ކުރެއްވި ދަތުރުފުޅަށް 1.3 މިލިއަން ރުފިޔާ ހަރަދުކޮށްފައިވާކަން ހާމަވެއްޖެއެވެ.

މިކަން ހާމަވެފައިވަނީ ނައިބު ރައީސް ޕެރިހަށް ކުރެއްވި ދަތުރުފުޅާއި އަދި އިރާނުގެ ރައީސްގެ ހުވާ ކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް އެގައުމަށް ކުރެއްވި ދަތުރުފުޅުގެ ހަރަދު ތަފްސީލު ހާމަކޮށް އާންމުކުރި ތަފާސް ހިސާބުތަކުންނެވެ.

އެގޮތުން ނައިބު ރައީސް ޕެރިހަށް ކުރެއްވި ދަތުރުފުޅަށް ވަނީ 1،344،127.04ރ. ހަރަދުވެފައެވެ. ނައިބު ރައީސް އިރާނަށް ކުރެއްވި ދަތުރުފުޅަށް ހަރަދުވެފައިވަނީ 464،617.43ރ. އެވެ.

ނައިބު ރައީސް ޕެރިހަށް ވަޑައިގެންނެވުމުގައި މުހިއްމު ތިން ސަބަބެއް ހިމެނޭ ކަމަށާއި އެއީ އޮލިމްޕިކްސް އަކީ ދުނިޔޭގެ އެންމެ ބޮޑު ކުޅިވަރު މުބާރާތަށް ވެފައި، ޕެރިހުގައި ބޭއްވި މި މުބާރާތަކީ ފުރަތަމަ ފަހަރަށް ދިވެހި އެތްލީޓަކު ކޮލިފައިވެގެން ކުޅުނު ފުރަތަމަ މުބާރާތަށްވުމާއި، ފްރާންސަކީ ކުޅިވަރުގައި ފުންނާބު އުސް އެއް ގައުމަށް ވެފައި، ކުޅިވަރުގެ ދާއިރާ އިން ދިވެހި އެތްލީޓުންނާއި ދިވެހި ކުޅިވަރުގެ ވަސީލަތްތައް ތަރައްގީ ކުރުމުގައި ގެންގުޅޭނެ އައު ގޮތްތައް ދެނެގަނެ، ފުރުސަތުތައް ހޯދުމަށް މަޝްވަރާ ކުރެވުނު ކަމަށް ރައީސް އޮފީހުން ބުނެއެވެ.

ރައީސް އޮފީހުން މިފަދައިން ބުނެފަިއވާި ނަމަވެސް ރާއްޖޭގެ އިގްތިސޯދު ދަށަށް ގޮސް މާލީ ހާލަތު ދަށްވެ ސޮވެރިން ޑިފޯލްޓަކަށް ރާއްޖެ ގޮސްދާނެކަމުގެ އިންޒާރު ދުނިޔޭގެ މާލީ އިދާރާތަކުން ދީފައިވެއެވެ. އަދި ދައުލަތުގެ ޚަރަދު ކުޑަކޮށް އިސާލާހީ އިގްތިސޯދީ ފިޔަވަޅުތަކެއް އެޅުމަށް ސަރުކާރަށް ގޮވާލާފައިވެއެވެ.

ނަމަވެސް ސަރުކާރުން ޚަރަދު ކުޑަކުރުމުގެ ބަދަލުގައި ގެންދަނީ ރައްޔިތުން ޚަރަދުކުޑަކޮށް ތިރި ދިރިއުޅުމަކަށް ބަދަކުކުރަން އަންގަމުންނެވެ. މިކަމުގެ ސަބަބުން ގިނަ ބައެއްގެ ނުުރުހުން ސަރުކާރަށް އަމާޒުވެފައިވެއެވެ.