ދަޢުލަތުގެ ދަރަނީގެ ސިޔާސަތާއި މާލީ ސިޔާސަތު ސިއްރު ކުރުމަށް އެދުމަށް ފަހު މިހާރު އެ ނިޔަތް ނެތް ކަމަށް މާލީ ވަޒީރު މިނިސްޓަރު މުހައްމަދު ޝަފީގު ވިދާޅުވެއްޖެއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގެ މިއަދުގެ ބައްދަލުވުމުގައި ވާހަކަ ދައްކަވަމުން ޑރ. ޝަފީޤު ވިދާޅުވީ ދައުލަތުގެ މާލީ އަދި ދަރަނީގެ ސިޔާސަތު ސިއްރުކުރުމުގެ ވިސްނުމެއް ސަރުކާރުގައި ނެތް ކަމަށެވެ. އަދި މިއީ ރައްޔިތުންނަށް ތަފްޞީލުކޮށް އެނގެން ޖެހޭނެ މަޢުލޫމާތެއް ކަމަށްވެސް އޭނާ ފާހަގަކުރެއްވިއެވެ.

ވަޒީރު އިތުރަށް ވިދާޅުވީ މީގެފަހުން ދައުލަތުގެ ދަރަންޏާއި މާލީ ސިޔާސަތު ފިނޭންސް މިނިސްޓްރީގެ ވެބްސައިޓާއި ސަރުކާރުގެ ގެޒެޓުގައި އާންމުކުރައްވާނެ ކަމަށެވެ. މީގެ ކުރިންވެސް މި މަޢުލޫމާތު މަޖިލީހާ ހިއްސާކުރުމަށްފަހު މާލީ ވުޒާރާގެ ވެބްސައިޓުގައި އާންމުކުރަމުން ގެންދިޔަ ނަމަވެސް، ކުރީގައި މި ރިޕޯޓުތައް ސިއްރުކުރުމަށް މަޖިލީހުގައި އެދިވަޑައިގަތީ ވަޒީރު ޝަފީޤެވެ.

ވަޒީރު މިފަދައިން ވިދާޅުވެފައިވާއިރު، ފިސްކަލް އަދި ދަރަނީގެ ސިޔާސަތު އަންގައިދޭ ބަޔާން މަޝްވަރާކުރަން ބާއްވާ މާލިއްޔަތު ކޮމިޓީގެ ބައްދަލުވުން ސިއްރުކުރަން ކުރިން ވަނީ އެދިފައެވެ. އަދި ދައުލަތުގެ ހިސާބުތައް އާންމުކުރުންވެސް މި ސަރުކާރުން ވަނީ ހުއްޓާލާފައިކަން ފާހަގަކޮށްލެވެއެވެ.