ކެއްސުންމަނާ ކުރުމަށް ބޭނުންކޮށް އުޅޭ ދިޔާ ބޭހެއް ކަމަށްވާ ކޮފްސީ ސިރަޕް ރާއްޖެ އެތެެރެކޮށް ވިއްކުމާއި ބޭނުންކުރުން މަނާކޮށްފިއެވެ.

މިކަން ހާމަކޮށްފައިވަނީ، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްއޭޑީ) އިން ނެރުނު ބަޔާނެއްގައެވެ.

ބަޔާނުގައި ވަނީ ރާއްޖެ އެތެރެކޮށް ބޭނުންކުރާ ކޮފްސީ ސިރަޕުގައި ކުނޑި ކޮޅުތަކެއް ހުންނަކަން ފާހަގަކުރެވިފައިވާތީ އެބޭހުގެ ރައްކާތެރިކަން ކަށަވަރުކުރުމަށް އެކަންތައް އިތުރަށް ބަލަމުންދާ ކަމަށެވެ.

އެގޮތުން ބޭހުގެ ރައްކާތެރިކަން ކަށަވަރުކުރުމަށްޓަކައި މިކަންތައް އިތުރަށް ބެލުމުގެ މަސައްކަތް އެ އޮތޯރިޓީގެ ފަރާތުން ކުރަމުންދާ ކަމަށާ އެހެންކަމުން ދިމާވެފައިވާ މައްސަލަ އެ އޮތޯރިޓީން ބެލުމަށްފަހު ވަކި ގޮތެއް އަންގަންދެން އެ ޕްރޮޑަކްޓް އެތެރެކުރުމާއި، ވިއްކުމާއި އަދި ބޭނުންކުރުމަކީ މަނާކަމެއް ކަމުގައި ކަނޑައަޅާފައިވާކަން ވަނީ ހާމަކޮށްފައެވެ.

ކޮފްސީ ސިރަޕް އުފައްދަނީ އިންޑިއާގެ ކުންފުންޏެއް ކަމަށްވާ އެމްއެމްސީ ހެލްތު ކެއާ ލިމިޓެޑުންނެވެ.

ކޮފްސީ ސިރަޕް ވިއްކުމާ އެތެރެކުރުން މަނާކޮށްފައިވާއިރު ދާދި ފަހުން ވެސް ވަނީ ރޯގާއަށް ބޭނުންކުރާ ބޭހެއް ވިއްކުން މަނާކޮށްފައެވެ. އެގޮތުން އިންޑިއާގެ ބޭސް އުފައްދާ ކުންފުންޏެއް ކަމަށްވާ ސެނޮފީ އިންޑިއާ ލިމިޓެޑްއިން އުފައްދާ އެލެގްރާ ސަސްޕެންޝަންގެ ތިން ބެޗެއްގައި މައްސަލަތަކެއް ދިމާވެފައިވާކަން އުފެއްދި ކުންފުނިން އަންގާފައިވާތީ އެ ބޭސްވެސް ރާއްޖެ އެތެރެކޮށް އަދި ވިއްކުންވެސް ވަނީ މަނާކޮށްފައެވެ.