ބުޅާމަސް އަޅައިގެން ކާބޯތަކެތި ވިއްކާކަމަށް ބުނާ މީހާ އަތުލައިގަތީ ސެލޫނަކުން ކަމަށް އިމިގްރޭޝަނުން ހާމަކޮށްފި އެވެ.

ބަންގްލަދޭޝްގެ ރައްޔިތެއް ކަމަށްވާ އަރަފާތު ހުސައިން ފަސް ދުވަހުގެ ތެރޭގައި އިމިގްރޭޝަނަށް ހާޒިރުވުމަށް ރޭ އިއުލާންކުރި ނަމަވެސް މިއަދު އިމިގްރޭޝަނާއި ފުލުހުންނާ ގުޅިގެން ހިންގި އޮޕަރޭޝަނަކުން އޭނާ ވަނީ އަތުލައިގެންފަ އެވެ.

އިމިގްރޭޝަނުން އާންމުކުރި ފޮޓޯއިން އޭނާ ފެންނަނީ ސެލޫނެއްގެ ތެރޭގައި ތޮތްޕެއް އަޅައިގެން ހުއްޓަ އެވެ.

އަރަފާތު ބުޅާ މަހުގައި ކާބޯތަކެތި ވިއްކާކަމަށް ބުނާ މައްސަލަ ފެންމަތިވީ ރާއްޖޭގައި ޖަނަވާރުގެ ހައްގުގައި މަސައްކަތްކުރާ ފެލީން ވެލްފެއާ އޯގަނައިޒޭޝަނުން އެކްސްގައި ކުރި ޕޯސްޓަކާ ގުޅިގެން ނެވެ.

އެ ޖަމިއްޔާއިން ބުނީ އަރަފާތަކީ ގަވާއިދާ ޚިލާފަށް މާލޭ ވަޅޯމަސް މާރުކޭޓުގައި މަސައްކަތް ކުރަމުންދާ މީހެއް ކަމަށާއި އަދި ބުޅާ މަރައި، އޭގެ މަހުން ކާއެއްޗެހި ތައްޔާރުކޮށް، ޕާރުސަލް ހަދައިގެން ވިއްކާކަމުގެ ތުހުމަތު އޭނާއަށް ކުރެވޭކަމަށްވެސް ބުނެފައި ވެއެވެ.