ވ. އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލަ އަލުން ފަށަން ކުރިމިނަލް ކޯޓުން ތައްޔާރުވެއްޖެއެވެ.

ވ. އާރަށް ކުއްޔަށް ދޫކުރުމުގައި ހިންގި ކަމަށް ބުނާ ހިޔާނާތުގެ މައްސަލާގައި އުފުލާ ކުރިން ހުކުމްވެސް ކޮށްފައިވަނިކޮށް އެ ހުކުމް ބާތިލުކޮށް އަލުން ބެލިދާނެ ކަމަށް ހައި ކޯޓުން ވަނީ ހުކުމްކޮށްފައެވެ.

އެގޮތުން އާރަށު މައްސަލައިގެ އަޑުން އެހުންތައް އަލުން ކުރިމިނަލް ކޯޓުގައި މާދަމާ ފެށުމަށް ވަނީ ތާވަލްކޮށްފައެވެ.

މާދަމާ ހެނދުނު 9:00 ގައި އޮންނަ ޝަރީއަތް ކުރިއަށް ދިއުމަށް ހަަމަޖެހިފައިވަނީ އޮންލައިން ކޮށެވެ.

ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިިން ކުށް ރައީސް ޔާމީންގެ މައްޗަށް ސާބިތުވާ ކަމަށް ކަނޑައަޅާ 11 އަހަރަށް ޖަލަށް ލުމާއި 5 މިލިއަން ޑޮލަރުން ޖޫރިމަނާކުރުމަށް އަދި ޔޫސުފް ނައީމްގެ މައްޗަށް ރިޝްވަތު ދިންކަމުގެ ކުށް ސާބިތުވެ 3 އަހަރާއި 2 މަހާއި 12 ދުވަހުގެ ޖަލު ހުކުމެއް ކްރިމިނަލް ކޯޓުން ކުރީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.

މި މައްސަލަ ރައީސް ޔާމީން އަދި ޔޫސުފް ނައީމްގެ ފަރާތުން ހައިކޯޓުގައި އިސްތިއުނާފު ކުރުމުން ހައިކޯޓުން ކަނޑައަޅާފައިވާ އުޞޫލުތަކާ އެއްގޮތަށް ކުރިމިނަލް ކޯޓުގެ ނިންމުމާމެދު އަލުން ގޮތެއް ކަނޑައެޅުމަށްޓަކައި މައްސަލަ ކުރިމިނަލް ކޯޓަށް ތަޙުވީލު ކޮށްފައިވަނީ 18 އެޕްރީލް 2024 ދުވަހުއެވެ.

އާރަށުގެ މައްސަލަ އަލުން ބަލަން ފަށާއިރު ހައިކޯޓުގެ ނިންމުމުގައި މައްސަލަ އަލުން ބަލައި ގޮތެއް ކަނޑައަޅަން އެންގިއިރު، ދައުލަތުން ހުށަހެޅި ހެކިތައް އެއްފަރާތްކުރުމަށް އަންގާފައިވާ ބައި ދައުލަތުން ވަނި ސުޕްރީމު ކޯޓުގައި އިސްތިއުނާފްކޮށްފައެވެ. އަދި އެ ކޯޓުން ވަނީ މައްސަލަ ބަލައިވެސް ގަނެފައެވެ

ރައީސް ޔާމީންގެ ޝަރީއަތް އަލުން ފަށަން ދައުލަތުން މަސައްކަތްކުރަނީ ޕީޖީގެ މަގާމުގައި ހުންނެވި، ޕިއެންސީއިން ހިމާޔަތް ދީފައިވާ އެމްޑީއެން ޝަމީމު މަގާމުގައި ދައުރު ނިމެންދެން ބެހެއްޓުމަށް ރައީސް މުހައްމަދު މުއިއްޒު ހެއްދެވި ޑީލެއްގެ ތެރެއިން ކަމަށް އަޑު ފެތުރިފައިވެއެވެ.