ރައްޔިތުންގެ މަޖިލީހުން އަމަލު ކުރަމުން އެދަނީ ދުސްތޫރީ ގޮތުން ރަނގަޅަށް ކަމަށާއި، އެކަން ނޭނގިގެން އުޅޭ ބަޔަކީ މިހާރުގެ ސަރުކާރު ކަމަށް ރައީސް ޔާމީންގެ އިސް ގާނޫނީ ވަކީލް، ޑރ.މުހައްމަދު ޖަމީލް އަހުމަދު ވިދާޅުވެއްޖެއެވެ.

މިއަދު ސަރުކާރުގެ އިސްވެރިންތަކެއް ސަރުކާރުގެ ބައެއް ވަޒީރުންތަކަަށް ރުހުން ނުދިނުމާއި ގުޅީގެން ނުރުހުން ފާޅުކޮށް ނުކުމެ، ރައްޔިތުންގެ މަޖިލިސް ކުރިމަތީގައި އިހުތިޖާޖު ކޮށްފައިވެއެވެ.

މިކަމާއި ގުޅިގެން ރައީސް އޮފީހުގެ ސްޕެޝަލް އެޑްވައިޒަރު، އަބްދުއްރަހީމް އަބްދުﷲ (އަދުރޭ) ވިދާޅުވީ، ރުހުން ނުދިނަސް ސަރުކާރު ހުއްޓުމަކަށް ނުގެނެވޭނެ ކަމަށާއި، މި ސަރުކާރު ބާރު ސްޕީޑުގައި ކުރިއަށްދާނެ ކަމަށެވެ.

އަދުރޭ މިފަދައިން ވިދާޅުވުމާއި ގުޅިގެން ރައްދުދެއްވައި ޑރ.ޖަމީލް ވިދާޅުވީ، މަޖިލީހުގައި އަމަލުކުރަމުން އެދަނީ ދުސްތޫރީ ގޮތުން ރަނގަޅަށް ކަމަށާއި، އެކަން ނޭނގިގެން އުޅެެނީ އަދުރޭމެންގެ ސަރުކާރަށް ކަމަށެވެ.

އިތުރަށް ޑރ.ޖަމީލް ވަނީ އެބޭފުޅުން ދަސްކުރަންވީ އަޚުލާގު ކަމަށާއި، އެއްވެސް ހާލަތެއްގައި މުޒާހަރާކޮށް ޤާނޫނާއި ޚިލާފު ވެގެން ނުވާނެ ކަމަށް ވިދާޅުވެފައެވެ. އަދި މިހާރު އެބޭފުޅުން އެ ތިއްބެވީ ސަރުކާރުގައި ކަމަށާއި، އަމުދުން ސަރުކާރުގެ އިސްވެރިން ވާންޖެހޭނީ ކިޔަމަންތެރި ބަޔަކަށް ކަމަށް ވިދާޅުވެފައެވެ.

އިތުރަށް އިދިކޮޅުގައި ތިބޭގޮތަށް އުޅުމަކީ ޒިއްމާދާރުކަމެއް ނޫން ކަމަށްވެސް ޑރ.ޖަމީލް ވަނީ ހަނދުމަފުޅު އާ ކޮށްދެއްވާފައެވެ.

މަޖިލިސް ބޭރުގައި ސަރުކާރުގެ އިސްވެރިން އިހުތިޖާޖު ކުރަމުންދިޔައިރު، މަޖިލިސް ތަޅުމުގެ އެތެރޭގައިވެސް އެތައް ހަމަނުޖެހުންތަކެއް ހިންގަމުން ދިޔަކަން ފާހަގަކޮށްލެވެއެވެ.