ބުޅާ މަސް ބޭނުންކޮށްގެން ކާބޯތަކެތި ތައްޔާރުކޮށް ވިއްކާ ކަމަށް ތުހުމަތު ކުރާ ބަންގްލަދޭޝްގެ އަރަފާތު ހޮސެއިން، 32، ކާތަކެތި ތައްޔާރުކުރި ބަދިގެއިން ބުޅާ މަސް ހުރިތޯ ބެލުމަށްޓަކައި ސާމްޕަލް ނަގައިފި އެވެ.

މިކަން ހާމަކޮށްފައި ވަނީ ހޯމްލޭންޑް ސެކިއުރިޓީ މިނިސްޓްރީ އާއި ހެލްތު މިނިސްޓްރީ އަދި އިކޮނޮމިކް މިނިސްޓްރީ ގުޅިގެން ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން އެވެ.

އެގޮތުން މިނިސްޓަރ އިހުސާން ވިދާޅުވީ އަރަފާތުގެ ބަދިގެއިން ސާމްޕަލް ނެގުމަށް ފަހު އެތަން ވެރިފަރާތާ ހަވާލުކޮށްފައިވާ ކަމަށެވެ.

އެ ސާމްޕަލްތަކުގެ ނަތީޖާ ލިބުނުހާ އަވަހަކަށް ރައްޔިތުންނަށް އެތަނުގައި ބުޅާ މަސް ހުރިތޯ ނުވަތަ ނޫންތޯ ހާމަކުރާނެ ކަމަށް ވެސް މިނިސްޓަރ އިހުސާން ވިދާޅުވި އެވެ.

އަރަފާތު ބުޅަކުން ކާއެއްޗެހި ތައްޔާރުކުރާ މައްސަލަ ފެންމަތިވީ އާންމުން ކުރި ޝަކުވާތަކާއި ބުޅާތަކުގެ ހައްގުގައި މަސައްކަތް ކުރާ ފީލައިން ވެލްފެއާ އޯގަނައިޒޭޝަންއިން ސޯޝަލް މީޑިއާގައި ކުރި ޕޯސްޓުތަކާ ގުޅިގެންނެވެ.