ދައުލަތުގެ މީޑިޔާ ޕީއެސްއެމްގެ މެނޭޖިންގ ޑިރެކްޓަރު ކަމުން ޒީނާ ޒާހިރު އިސްތިއުފާ ދެއްވައިފި އެވެ.

"ތޭރަ އޮންލައިން" އަށް މައުލޫމާތު ދެމުން ރައީސް އޮފީހުގެ އިސް ތަރުޖަމާނު ހީނާ ވަލީދު ވިދާޅުވީ ޒީނާގެ އިސްތިއުފާގެ ސިޓީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އަށް ހުށަހެޅުއްވިކަން ރައީސް އޮފީހަށް އެނގިފައިވާ ކަމަށެވެ.

މިކަމާ ގުޅިގެން ޕީސީބީގެ ބަހެއް އަދި ލިބިފައިނުވާއިރު ޕީސީބީން އިސްތިއުފާ ދެއްވި ކަމެއް ރަސްމީކޮށް ހާމަކޮށްފައި ވެސް ނުވެއެވެ.

އިސްތިއުފާ އާއި ގުޅިގެން މީޑިޔާތަކުން ޒީނާއާ ސުވާލުކުރުމުން އޭނާ ވިދާޅުވީ މިއަދު ހަވީރު 4:30 ހާއިރު އިސްތިއުފާގެ ސިޓީ ހަވާލުކޮށްފައިވާނެ ކަމަށެވެ. ނަމަވެސް ސަބަބެއް އޭނާ ހާމައެއް ނުކުރައްވަ އެވެ.

ޒީނާ ޕީއެސްއެމްގެ އެމްޑީއަކަށް ރައީސް ޑރ މުހައްމަދު މުއިއްޒު ހަމަޖެއްސެވީ ވެރިކަމާ ހަވާލުވެ، މިދިޔަ ނޮވެމްބަރު މަސްތެރޭގައެވެ.

ޒީނާގެ އިސްތިއުފާއި ގުޅިގެން ޕީއެސްއެމްގެ ބައެއް މުވައްޒަފުން ވަނީ އުފާވެސް ފާޅުކޮށްފައެވެ. އެއީ ޒީނާ ޕީއެސްއެމް ހިންގެވީ އެއްވެސް ދުވަސްވީ މުވައްޒަފެއްގެ ލަފާވެސް ހޯދުމަކާނުލާ ކަމުން ގިނަ މުވައްޒަފުންގެ ހިތުގައި ޒީނާއާ ދޭތެރޭ ވަނީ ހިތްހަމަނުޖެހުން އުފެދިފަ އެވެ.