ރައީސް އަބްދުﷲ ޔާމީން މިނިވަން ކުރައްވާނެކަމުގެ ވަޢުދުވެވަޑައިގެން އައި ސަރުކާރަކުން އެމަނިކުފާނަށް އިންސާފު ހޯދައްވައިނުދެއްވަނީ ކީއްވެގެންތޯ ކުރި ސުވާލަށް ސަރުކާރުގެ ފަރާތުން އެއްވެސް ޖަވާބެއްދެއްވާފައިނުވެއެވެ.
އާދިއްތަ ދުވަހު ބޭއްވި ކެބިނެޓް ބައްދަލުވުމުގައި މަޝްވަރާކުރެވުނު ކަންކަން ހިއްސާކުރެއްވުމައްޓަކައި ރައީސް އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ބޭއްވި ނޫސްވެރިންގެ ބައްދަލުވުމުގައި ޗެނަލް 13 ގެ ފަރާތުން ސުވާލު ކުރެއްވުމުން އެ ސުވާލަށް އެއްވެސް ޖަވާބެއްދެވެން ނެތްކަމަށް ނާޒިމް ވަނީ ވިދާޅުވެފައެވެ.
އަޅުގަނޑު މިތަނަށް އައިސް މިހުއްޓި ހުންނަނީ އަޅުގަނޑަށް ދެއްވި ޓާސްކުގައި ހުރިކަންކަން ކުރަން. އަޅުގަނޑުގެ ފަރުދީ އޮޕީނިއަން ކަންތައްތަކުގައި ދީގެން ކަމަކުނުދާނެ.
ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް
ނާޒިމް އެ ސުވާލަށް ޖަވާބު ދެއްވަން ބޭނުން ނޫންކަމަށް ވިދާޅުވެފައިވަނީ ނާޒިމްގެ މަގާމުގައި ހުންނަވައިގެން އެ ސުވާލަށް ޖަވާބުދެވެން ނެތީމަކަމަށް އޭނާ ވަނީ ވިދާޅުވެފައެވެ. ސަރުކާރުގެ ކަންކަން ހިއްސާ ކުރެއްވުމަށްޓަކައި ބާއްވާ ނޫސްވެރިންގެ ބައްދަލުވުންތައް ބާއްވަނީ ނާޒިމް އެކަނިކަމުން ނޫސްވެރިން އަންނަނީ ކަންބޮޑުވުން ފާޅުކޮށް ބައިވަރު ސުވާލުތަކެއް އަމާޒުކުރައްވަމުންނެވެ.
