ގާނޫނު ނަގަހައްޓާން އޮތް ކަސްޓޯޑިއަލްގެ ވެރިޔާއަށް ކުރެވޭ ބޮޑެތި ތުހުމަތުތައް ހުރިއިރު މައްސަލަތައް ހައްލުވާނެތޯ އައްސަވާ ރައީސް އަބްދުﷲ ޔާމީންގެ ވަރުގަދަ ސުވާލެއް އަމާޒުކުރައްވައިފިއެވެ.

މިދިޔަ ހަފްތާ ބުރާސްފަތި ދުވަހުގެރޭ ދަ ފްރޮންޓު އޮފީހުގައި ބޭއްވި ޖަލްސާގައި، ކާނަލް ރިޓަޔާޑް އަހުމަދު ފަޔާޒު (ޕާޕާ) ވަނީ ފުލުހުންގެ ތަހުގީގަކަށް، ކުރީގެ ކޮމިޝަނަރ އޮފް ޕޮލިސް އަބްދުﷲ ރިޔާޒުގެ ފޯނުން ނެގި ވަޓްސް އަޕް މެސެޖުތަކެއް ހިމަނައިގެން އެކުލަވާލާފައި އޮތް ފޮރެންސިކް ރިޕޯޓެއްގެ ބައިތައް އާންމުކުރައްވާފައެވެ.

އެ ރިޕޯޓުގައި ބަޔާންކޮށްފައިވާ ގޮތުގައި އަބްދުﷲ ރިޔާޒުގެ ފޯނުން ފެނުނު ވަޓްސް އަޕް މެސެޖުތަކަކުން ހާމަވެފައިވާ ގޮތުގައި އަދުރޭ ވަނީ އަދީބު އަތުން 4 މިލިއަން ރުފިޔާ ނަގާފައެވެ. އަދި ރައީސް ޔާމީން ހައްޔަރުކުރަން މާމިގިލީ ކޯޓުން ނެރުނު އަމުރާ އެކު އެމަނިކުފާނު ހައްޔަރުކޮށް ހުކުމެއް ކުރެވިއްޖެ ނަމަ އިތުރު 16 މިލިއަން ރުފިޔާ އިތުރަށް އަދުރޭއަށް ލިބެޭނެ ކަމަށް ހާމަކޮށްފައިވެއެވެ. މީގެ އިތުރުން މިހާރުގެ ރައީސް މުހައްމަދު މުއިއްޒު 14 މިލިއަން ރުފިޔާ އަދިބު އަތުން ނަގާފައިވާ ކަން ވެސް ހާމަވެފައިވެއެވެ.

މިކަމަށް އިޝާރާތްކުރައްވާ ރައީސް ޔާމީން ވަނީ އެހެންކަމުން އެމްއެމްޕީއާރުސީ މައްސަލަ ބަލާނެ ކަމަށް ހަރު އަޑުން މި ސަރުކާރުން ބުނަމުންދާއިރު ފުރތަމަ ފެށުމުގައިވެސް ސަރުކާރު މިއޮތީ އެމްއެމްޕީއާރުސީ މައްސަލައިގައި ކަރު މަޅި އެޅިފައި ކަމަށާ އެހެންކަމުން އެ މައްސަލަ މި ސަރުކާރުން ބަލާނެ ގޮތަކާ މެދު ރައީސް ޔާމީން ވަނީ ސުވާލު އުފައްދަވާފައެވެ.

އެރޭގެ ޖަލްސާގައި ރައީސް ޔާމީން ވަނީ، އަދުރޭގެ ދަރިފުޅު، ފައިސަލް އިބްރާހިމު ރައީސް ޔާމީން އޭނާގެ ބައްޕަ ގެންގުޅުނީ އަޅެއްހެން ކަމަށް ވިދާޅުވި ވިދާޅުވުމަށް ރައްދުވެސް ދެއްވާފައެވެ. އެމަނިކުފާނު ވިދާޅުވީ، ފައިސަލްގެ ބައްޕަ ޕީޕީއެމްގެ ތެރޭގައި އަޅެއްގެ ގޮތުގައި ގެންގުޅުނު އިރު އެކަމާ ދެކޮޅު ހަދާ ޕީޕީއެމް ދޫކޮށް ނުދިޔައީ ކީއްވެ ކަމާ މެދު ސުވާލު ނުއުފެދޭތޯ ކަމަށެވެ. އަދި އެ ސުވާލުގެ ޖަވާބަކީ އަދުރޭ ޕީޕީއެމް ތެރޭގައި ހުރީ އޭނާއަށް މާލީ މަންފާތަކެއް ލިބެމުން ދިޔުން ކަން މިހާރު ހާމަވާނެ ކަމަށެވެ.