ދިވެހިރާއްޖޭގައި އަދުލު އިންސާފާއި ހަމަހަމަ ކަން ގާއިމު ކުރުމަށް ވަކާލާތުކުރަމުން ވެރި ކަމަށް އައި މީހުން ވެރިކަމަށް އައީ ކިހިނެއްތޯ ކާނަލް ރިޓަޔާޑް އަހުމަދު ފަޔާޒް (ޕާޕާ) ސުވާލު އުފައްދަވައިފިއެވެ.

ޕީއެންއެފްގެ ފްރޮންޓް އޮފީސް ޖަލްސާގައި ހޯމަ ދުވަހުގެ ރޭ ވާހަކަދައްކަވަމުން ޕާޕާ ވިދާޅުވީ 2016 ވަނަ އަހަރު ރައީސް ޔާމީން އަވަހާރަކޮށްލުމަށް ދިން ލޯންޗް ހަމަލާގައި ތަހުގީގީ އިދާރާތަކުގެ ބޭފުޅުން ހާމަވެފައިވާ ކަމަށާއި ކަން މިހެން ހުރި އިރު ރައްޔިތުންނަށް އިންސާފު ގާއިމުކޮށްދޭނެ ކަމަށް އިތުބާރެއް ނުކުރާނެ ކަމަށް ޕާޕާ ފާހަގަކުރެއްވިއެވެ.

މީގެ އިތުރުން، ޕާޕާގެ ވާހަކައިގައި ދިވެހި ފުލުހުންގެ އިދާރާއިން މި ހަމަލާގައި ބައިވެރިކަމަށް އޭރުގެ އެސިސްޓެންޓް ކޮމިޝަނަރ އޮފް ޕޮލިސް އަބްދުލް މަންނާން، އަލީ ރަޝީދު އަދި ޗީފް އިންސްޕެކްޓަރ އޮފް ޕޮލިސް އިސްމާއީލް ފަރީދު އަދި ކުރީގެ ސީޕީ އަބްދުﷲ ރިޔާޒުގެ ނަން ހާމަކުރެއްވިއެވެ.

ފުލުހުންގެ ތެރެއިން ސްޕެޝަލް އޮޕަރޭޝަންސް އިން އެ ފަރާތްތަކުން އިތުބާރުކުރެވޭ ފުލުހުންނާއި ރައީސް ޔާމީން ދަން ޖައްސާ މަރުވި ކަމަށް ފްރޭމް ކުރުމަށްވެސް ހަވާލުކުރި ކަމަށް ޕާޕާ ވިދާޅުވިއެވެ.

މިއާއި އެކު، މި ފަރާތްތަކާއި މިހާރުގެ ރައީސް ޑރ މުއިއްޒު ދެކެވިފައިވާ ވާހަކަތައް ބަޔާންކޮށް ތައްޔާރުކޮށްފައިވާ ރިޕޯޓަށްވެސް ޕާޕާގެ ވާހަކައިގައި އަލިއަޅުވާލާފައިވެއެވެ.

އެހެންކަމުން، ރާއްޖޭގައި ހިނގާފައިވާ ގޮތް ނޭގޭ މަރުތަކާއި އަދި އެ ނޫންވެސް ރައީސުންނަށް އަމާޒުކޮށް ދީފައިވާ ނުރައްކާތެރި ހަމަލާތަކުގެ ފުރިހަމަ ތަހުގީގެއް ހިންގޭނެ ކަމާއި މެދު ޝައްކު ކަމަށް ޕާޕާ ވިދާޅުވިއެވެ.