ގައުމުގެ ހައްގުގައޭ ވިދާޅުވެ ރައީސް މުހައްމަދު މުއިއްޒު ގެންދަވަނީ ބޮޑެތި މުޖުރިމުން ކައިރިކުރަމުންކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައިވަނީ ދަ ފްރޮންޓު އޮފީހުގައި އޮތް ޖަލްސާގައި ވާހަކަފުޅު ދައްކަވަމުންނެވެ.
މިރޭ ދަ ފްރޮންޓު އޮފީހުގައި ކުރިއަށް ދާ ޖަލްސާގައިވަނީ ބުރާސްފަތި ދުވަހުގެ ރޭ ތިލަ ކުރި ފޮރެންސިކު ރިޕޯޓުގެ ބާކީ ބަޔާ ގުޅޭ މައުލޫމާތު ހިއްސާކޮށްފައެވެ. އެކަމަށް އިޝާރާތްކުރައްވާ ރައީސް ޔާމީން ވިދާޚުވީ، ރައީސް މުއިއްޒު ވަށާ ލައިގެން ތިބީ ބޮޑެތި ކުށްވެރިން ކަމަށެވެ.
އެގޮތުން އެމްއެމްޕީއާރުސީ ފައިސާ ލިބުނު އަދުރޭއާ ރައީސް ޔާމީން ހައްޔަރުކުރަން މާމިގިޅި ކޯޓުން ނެރުނުގެ އަމުރުގެ ފަހަތުގައި ހުރިކަން ސާބިތުވެ ހުކުމް ކުރި މިހާރުގެ ފޮރިން މިނިސްޓްރީގެ ސްޓޭޓު މުހުތާޛު މުހުސިންގެ ވާހަކަވެސް ރައީސް ޔާމީން ފާހަގަކުރެއްވިއެވެ.
ރައީސް ޔާމީން ވިދާޅުވީ މުހުތާޛުއަކީ ޖިނާއީ ބޮޑެތިކުށްތަކެއް ސާބިތުވެ ހުކުމް އައިސްފައިވާ މީހެއް ކަމަށާ އެފަދަ މީހަކު އެންމެ އަރިސްކޮށް ގެެނެސް ރައީސް އޮފީހުން މަގާމުދީ އޭގެ ފަހުން ފޮރިން މިނިސްޓްރީއަށް ބަދަލުކޮށްފައިވާއިރު، މުހުތާޛުއަށް ސަރުކާރުގެ މަގާމެއްގައި ހުރެވޭ ހުރުމާ މެދު ސުވާލު އުފެދޭ ކަމަށެވެ.
މުހުތާޛު ސަރުކާރަށް ލައިގެން ރައީސް މުއިއްޒު އުޅުއްވަނީ ޖިނާއީ ކުށްތަކެއް ކުރަންތޯ އައްސަވާ ރައީސް ޔާމީން ވަނި ސުވާލެއްވެސް ސަރުކާރަށް އަމާޒުކުރައްވާފައެވެ.
