ޕްރޮސެކިއުޓާ ޖެނަރަލް (ޕީޖީ) ގެ މަގާމަށް ގާތް ބޭފުޅަކު ގެންނަން ހުށަހަޅުއްވާފައި ނުވާނެ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله ބުނުމުން ގިނަ ބަޔެއްގެ ފާޑު ކިޔުން އަމާޒުވެއްޖެއެވެ.

މިގޮތުން ރައްޔިތުންގެ މަޖިލީހުގެ ރައީސްކަން ނުލިބިގެން އަދުރޭ ސަރުކާރު ތެރޭގައި މައްސަލަ އުފައްދާ ރައީސް މުއިއްޒު އާއި ދެކޮޅަށް ރޭވުންތައް ރޭވިކަމަށް އަޑު ފެތުރިފައިވިއެވެ. އަދި ގައުމުގެ ނައިބު ރައީސްކަން ވެސް ބޭނުންވެގެން އުޅުނު ކަމަށާ ނަމަވެސް ފަހުން އެ ވާހަކަތައް ދޮގު ކުރިކަމަށް ވެސް ގިނަ ބަޔަކު ފާހަގަކޮށްފައިވެއެވެ.

ޕްރޮސެކިއުޓަރ ޖެނެރަލްގެ މަގާމުގައި ހުންނެވި ހުސައިން ޝަމީމް އެ މަގާމުން ވަކި ކުރުމަށް މަޖިލީހުގެ ކޮމިޓީއަށް ހުށަހަޅައި، ކޮމިޓީން އެކަން ފާސްކޮށް، ސަރުކާރުގެ އަގުލަބިއްޔަތު އޮންނަ މަޖިލީހުން ވަނީ އޭނާ އެ މަގާމުން ވަކިކޮށްފައިވާއިރު، އަދުރޭގެ ދަނބިދަރި މަގާމަށް ހަމަޖެއްސުމަށް އެދިލައްވާފައިވާ ކަމަށް އިތުބާރުހުރި ފަރާތަކުން މައުލޫމާތު ހިއްސާކޮށްފައިވެއެވެ.

މީގެއިތުރުން، ރައީސް އަބްދުﷲ ޔާމީންވެސް ވަނީ އަބްދުއްރަހީމް އެފަދައިން މަސައްކަތް ކުރަނީ އެމްއެމްޕީއާރްސީ ޚިޔާނާތުގައި އަބްދުއްރަހީމް ބައިވެރިވެވަޑައިގެންފައިވާތީ މައްސަލަ ތަހުގީގުކޮށްފާނެތީ ކަމަށްވެސް ރައީސް ޔާމީން ތުހުމަތު ކުރެއްވާފައެވެ.

އަދުރޭގެ ދަރިކަލުން ޓުއަރިޒަމް މިނިސްޓަރގެ މަގާމުގައި ހުންނެވި އިރު ސަރުކާރުގެ އިސް މަގާމުތަކުގައި އަދުރޭގެ އާއިލާ ބޭފުޅުންނާއި ގާތް މީހުން ތިބިކަން ފާހަގަކުރެވެއެވެ.