ޖާސޫސުކޮށްގެން، ކަނޑައެޅިގެން ޤާނޫނާ ޚިލާފް އަމަލެއް ކޮށްގެން ޑރ މުހައްމަދު މުއިއްޒު ނެގި 14 މިލިއަން ރުފިޔާ މަނީ ލޯންޑަރިން އަށް ނުފެތޭނެ ގޮތަކީ ނެތްގޮތެއްކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އާދިއްތަ ދުވަހުގެ ރޭ ދަ ފްރޮންޓު އޮފީހުގައި ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ، އެމަނިކުފާނު ހައްޔަރުކޮށް އަވަހާރަކޮށްލަން ރޭވި ރޭވުމުގެ ތެރެއިން މިހާރުގެ ރައީސް މުއިއްޒަށް 14 މިލިއަން ރުފިޔާ، އެމްއެމްޕީއާރުސީގެ ފައިސާއިން އަދީބު ދީފައިވާއިރު އެ ފައިސާއަކީ އެމްއެމްޕީއާރްސީ ފައިސާއެއް ނޫނޭ މުއިއްޒު ވިދާޅުވާއިރު، އަދީބު އަތުގައި ހުރި ލާރިން އެމްއެމްޕީއާރްސީ ލާރިއަކީ ކޮބައިކަން ޑރ މުއިއްޒަށް އެނގިވަޑައިގަންނަވަންވާނެ ކަމަށް ރައީސް ޔާމީން ވިދާޅުވިއެވެ.

މަނީ ލޯންޑާިންގެ ވާހަކަ ދިވެހިންގެ ތެރެއަށް ތައާރަފްވީ ރައީސް ޔާމީންއާ ގުޅުވާ ކަމަކަށް ވީނަމަވެސް އޭގެ ކުރިންވެސް ފަހުން ވެސް މަނީ ލޯންޑަރިންގެ ޤާނޫނު އޮތް ކަމަށާއި، އެ ޤާނޫނުގައި ޤާނޫނާއި ޤަވާއިދާ ޚިލާފަށް ހޯދާ 2 ލައްކަ ރުފިޔާއަށް ވުރެ ބޮޑު އަދަދެއްގެ ފައިސާ ރިޝްވަތެއްކަމަށް ޤަބޫލުކުރެވޭ ކަމަށާއި، ރިޝްވަތަކަށް ވަންޏާ އެއީ މަނީ ލޯންޑަރިންގ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން މިފަދައިން ވިދާޅުވެފައިވާއިރު، އާދިއްތަ ދުވަހުގެރޭ ޕިއެންސީ ހަރުގޭގައި ބޭއްވި ޖަލްސާގައި ރައީސް މުއިއްޒު ވިދާޅުވެފައިވަނީ އެމްއެމްޕީއާރުސީގެ ފައިސާއެއް ލިބިފައި ނުވާނެ ކަމަށެވެ. އަދި އޭގައި ތިބި ގިނަ މީހުންނަކީ އެކަމުގައި ބައިވެރި މީހުންނެއް ނޫންކަމަށާ ވިޔަފާރި ކުރުމުގައި އޭގައި ޑޮލަރު މާރުކުރަންވުމުންނާ، ޑޮލަރު ދޭ ބައެއް ގޮތުން ޑޮލަރު މާރުކޮށްފައި ތިބި މީހުން އޭގައި ގިނަ މީހުންގެ ގޮތުގައި ތިބި ކަމަށް ވިދާޅުވެ އެމްއެމްޕީއާރްސީ ހިޔާނާތުގެ ތަހުގީގު ނުނިމެނީސް އޭގެ ތެރެއިން ގިނައީ ހިޔާނާތުގައި ބައިވެރިނުވާ މީހުންކަމަށް ރައީސް މުއިއްޒު ވަނީ ވިދާޅުވެ ޑިފެންސަށް ކުޅުއްވާފައެވެ.