ގާނޫނު އަސާސީގައި ދީފައި އޮންނަ ބާރުތަކުގެ ބޭނުން ހިފަންވާނީ ގާނޫނީ އިމުގެ ތެރެއިންކަމަށް، ރައީސް އަބްދުﷲ ޔާމީންގެ ޕާޓީއިން މަޖިލިހަށް ވާދަކުރައްވަން ޝައުގުވެރިކަން ފާޅުކުރައްވާފައިވާ އަލްއުސްތާޛު އައްސަދު ޝަރީފު ވިދާޅުވެއްޖެއެވެ.

ރައީސް ޔާމީންގެ ޕާޓީއިން، މަޖިލީހުގެ މައްޗަން ގޯޅީ އުތުރު ދާއިރާއަށް ވާދަކުރައްވަން ޝައުގުވެރިކަން ފާޅުކުރައްވާފައިވާ އައްސަދު މިފަދައިން ވިދާޅުވީ، ޕީޕަލްސް ނެޝަނަލް ފްރޮންޓް (ޕީއެންއެފް)އިން ބޭއްވި ޖަލްސާގައި ވާހަކަ ދައްކަވަމުންނެވެ.

އައްސަދު ވިދާޅުވީ، ތިން ބާރު ވަކިވެފައިވާ ނިޒާމެއްގެ ތެރެއިން ވެރިކަން ބައްޓަން ކުރާ ގައުމެއްގައި އެއް ބާރުން އަނެއް ބާރަށް ފާރަވެރިވުމަކީ އޮންނަން ޖެހޭ ކަމެއް ނަމަވެސް އެއް ބާރުން އަނެއް ބާރުގެ އިން ހުރަސްކޮށްގެން ނުވާނެ ކަމަށެވެ.

އައްސަދު އިތުރަށް ވިދާޅުވީ، ސަރުކާރުގެ ނިޒާމުތައް ފެއިލްވެފައިވާކަން ރައްޔިތުން މިހާރު ގަބޫލުކުރާ ކަމަށާ އޭގެ ސަބަބަކީ ދެ މަސް ދުވަސް ވެގެން ދިޔައިރު އެ މުއްދަތުގައި ފުއްދާ ދޭނެކަމަށް ވީ ވައުދުތައް ފުނި ޖެހިފައި ހުރި ހުރުން ކަމަށްވެސް އައްސަދު ވިދާޅުވިއެވެ.

އައްސަދު ވިދާޅުވީ މި ވެރިކަމަކީ ރައްޔިތުން ރައީސް ޔާމީންއަށް ދިން ވެރިކަމެއް ކަމަށާ އެހެންކަމުން ރައީސް ޔާމީން މިނިވަންނުކޮށް ގައުމުގެ ކަންކަން ހަމަ މަގަށް ނޭޅުވޭނެ ކަމަށެވެ.