ޗައިނާ-މޯލްޑިވްސް ފްރެންޑްޝިޕް ބުރިޖުގެ އެއް ލޭނު މަދުވެގެން ރައީސް އަބްދުﷲ ޔާމީން އަބްދުލްގައްޔޫމް އޭރުގެ ހައުސިންގ މިނިސްޓަރ އަދި އަދުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު ކީރިތިކުރައްވަންދެން ބަވާލިކަމަށް މަޖިލިސް ރައީސް އަބްދުއްރަހީމް އަބްދުﷲ (އަދުރޭ) ވިދާޅުވުމުން، ބުރިޖުން އެއްވެސް އިރެއްގައި ލޭނެއް މަދުވެފައި ނުވާކަން މިހާރުގެ ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓާރ އަބްދުﷲ މުއްޠަލިބްގެ ވާހަކައިން ހާމަވެެއްޖެ އެވެ.
ދާދި ފަހުން ސަންގު ޓީވީ އަށް އަރައި އަދުރޭ ވަނީ ސިނަމާލެ ބުރިޖުން އެއް ލޭނު މަދުވެގެން ޑރ މުއިއްޒު ކީރިތިކުރައްވަންދެން، ރައީސް ޔާމީން ބަވާލިކަމަށް ވިދާޅުވެފައެވެ.
އަދުރޭ އެފަދައިން ވިދާޅުވި ފަހުން މިނިސްޓަރު މުއްޠަލިބް ވަނީ އެކްސްގައި މީގެ 8 އަހަރު ކުރިން ރައީސް އޮފީހުގެ ވެބްސައިޓްގައި އޭރު އަޕްލޯޑްކޮށްފައިވާ ސިނަމާލެ ބްރިޖްގެ ޑިޒައިން އިފްތިތާހު ކުރި ވީޑިޔޯ ހިއްސާކޮށް، އެ ވީޑިޔޯ އިން ޑިޒައިންގައި ހުރީ ކިތައް ލޭންތޯ އާއި އިނިޝިއަލް ޑިޒައިނާ ތަފާތު ކޮށް ހަދާފައި ހުރިތޯ އަމިއްލައަށް ބެލުމަށް ވިދާޅުވެފައެވެ.
އެެހެންކަމުން މިނިސްޓަރ މުއްޠަލިބްގެ ވާހަކައިން ދޭހަވަނީ އަދުރޭ ހެއްދެވީ ދޮގުކަމެވެ.
