އިސްލާމް ދީނަށް ހުރުމަތްތެރިކޮށް ހިތައި، ދީނަށް ޚިދުމަތްކުރުމަކީ ކޮންމެ މުސްލިމެއްގެ މައްޗަށް ވާޖިބެއް ކަމަށާއި ހަވާ ނަފްސް ކޮންޓްރޯލްކޮށް އޭގެ މައްޗަށް ގަދަވެގެންވި މީހާ އަކީ ހިތްވަރުގަދަ މީހެއް ކަމަށް މިއަދުގެ ޚުތުބާގައި ވިދާޅުވެއްޖެއެވެ.

މިއަދުގެ ޚުޠުބާގައި އިސްލާމްދީނަށް ޚިދުމަތްކުރުމުގެ މުހިންމުކަން ފާހަގަކުރައްވާ ކުށުގެ ވެށިން ނުކުމެ ހަވާނަފްސު ކޮންޓްރޯލް ކުރުމުގެ މުހިންމުކަމާއި، ދުނިޔޭގެ ޙަޔާތަކީ ކުޑަ ދުވަސްކޮޅެއްކަން ހަނދާންކޮށްދިނެވެ. ޣާފިލްކަމުގެ ނިދިން ހޭލުމަށް އިލްތިމާސްކޮށް، އީމާންކަމުން ފުރިގެންވާ ހިތްތަކެއްގެ ވެރިންނަށް ވުމަށް ޚުތުބާގައި ގޮވާލާފައިވެއެވެ. އަދި އިސްލާމްދީނުގެ މަތިވެރިކަމާއި ފުރިހަމަކަން ބަޔާންކޮށް، ދީނަށް ޚިދުމަތްކުރުމަކީ ކޮންމެ މުސްލިމެއްގެ ވާޖިބެއް ކަމަށް ވަނީ ވިދާޅުވެފައެވެ.

އިސްލާމްދީނަކީ ފުރިހަމަ ދީނުކަން ފާހަގަކުރައްވަމުން ޚުތުބާގައި ވިދާޅުވީ ދީނަށް ތަބާވުމުން ދެދުނިޔޭގެ ނިޢުމަތް ލިބޭނެ ކަމަށާއި މުސްލިމުންގެ ކިބައިގައި ހުރި ފަރުވާކުޑަކަމާއި ކުށްތަކަކީ ދީނަށް ޚިދުމަތްކުރުމަށް އޮތް ހުރަހެއް ނޫން ކަމަށެވެ.

މިއަދުގެ ޚުޠުބާގައި ދީނަށް ޚިދުމަތްކުރުމުގެ މުހިންމުކަން އަންގައިދޭ ތާރީޚީ ވާހަކަތަކެއް ހިއްސާކުރެއްވިއެވެ. އަދި ފާފައެއް ކުރެވުމަކީ ދީނަށް ޚިދުމަތްކުރުމަށް ހުރަސްއެޅޭ ސަބަބެއް ނޫންކަމަށް ޚުޠުބާގައި ވިދާޅުވިއެވެ. އަދި މުސްލިމުންގެ މައްޗަށް ދީނަށް ޚިދުމަތްކުރުމަކީ ލާޒިމު ކަމެއްކަން ފާހަގަކުރައްވާފައިވާއިރު، މިއަދުގެ މުސްލިމުންގެ ޙާލަތާ މެދު ވިސްނާލުމުގެ މުހިންމުކަމާއި، އިސްލާމްދީނަށް ނަޞްރުދިނުމުގައި ކޮންމެ މުސްލިމެއްގެ ދައުރު އަދާކުރުމުގެ މުހިންމުކަން ޚުތުބާގައިި ވަނީ ފާހަގަކުރައްވާފައެވެ.

މުސްލިމުން އެއްބައިވަންތަކަމާއެކު ދީނަށް ޚިދުމަތްކުރުމަށް ޚުތުބާގައި ވަނީ ގޮވާލައްވާފައެވެ.