ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް މިގައުމުގައި ކަމެއް ހިނގާކަން އެނގިވަޑައިގަންނަވާނީ 7 ނުވަތަ 8 ގަޑިއިރު ފަހުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ ރުފިޔާ ކާޑަށް ޑޮލަރު ނުލިބޭ ގޮތައް ބޭންކް އޮފް މޯލްޑިވްސް އިން ނިންމައި ބަގާވާތެއްގެ ގޮތުގައި ސިފަކޮށް އެމައްސަލަ ތަހުގީގު ކުރަން ފެށުމުން އެކަމާ ގުޅިގެން ރައްޔިތުން ހިޔާލުފާޅުކުރާނެ ކަމަށެވެ. އަދި އެމީހަކަށް ފެންނަ ހިޔާލެއް ފާޅުކުރުމަކީ މައްސަލައެއް ނޫން ކަމަށް އެމަނިކުފާނު ވިދާޅުވިއެވެ.

މާލީ ބަގަވާތެއް ކުރަން އުޅުނު ކަމަށް ބުނެ މައްސަލަ ތަހުގީގު ކުރަމުންދާތީ، އެމައްސަލައާ ގުޅުވައި ކޮމިޝަނަރ އޮފް ޕޮލިސްގެ އިސްތިއުފާ އަށް ގޮވުމަކީ ވަރަށް ޣައިރު ޒިންމާދާރު އަމަލެއް ކަަމަށް ހޯމް މިނިސްޓަރު އަލީ އިހުސާން ވިދާޅުވެފައިވާތީ އެކަމަށް ރައްދު ދެއްވައި ރައީސް ޔާމީން ވިދާޅުވީ ރާއްޖެއަކީ ފުރިހަމަ ޑިމޮކްރަސީ ގައުމެއް ކަމަށެވެ.

އަދި އިސްތިއުފާއަށް ގޮވުން ނާތަހުޒީބުވާ ކަމަށްވާނަމަ ތަހުޒީބީ ކޮންކަމެއްތޯ ރައީސް ޔާމީން ވަނީ ސުވާލު އުފައްދަވާފައެވެ.

މީގެ އިތުރުން ރައީސް ޔާމީން ވިދާޅުވީ މިގައުމުގައި ކަމެއް ހިނގާކަން ރައީސް މުއިއްޒަށް އެނގިވަޑައިގަންނަވާނީ 7 ނުވަތަ 8 ގަޑިއިރު ފަހުން ކަމަށެވެ.