ގިނަ އަދަދެއްގެ ދިވެހިން ބޭސްފަރުވާ އަށް ގޮސް އުޅޭ އިންޑިއާގެ ބެންގަލޫރުގެ ދެ ހޮސްޕިޓަލަކަށް އާސަންދަ ދިނުން މެދުކަނޑާލައިފި އެވެ.

އާސަންދަ ދިނުން މެދުކަނޑާލި ދެ ހޮސްޕިޓަލަކީ އަސްޓަ ސީއެމްއައި ހޮސްޕިޓަލާއި ސައިޓް ކެއާ ހޮސްޕިޓަލް ޕްރައިވެޓް ލިމިޓެޑެވެ.

އާސަންދައިގެ މެނޭޖިން ޑިރެކްޓަރު އާމިނަތު ޒީނިޔާ ވިދާޅުވީ އެ ދެ ހޮސްޕިޓަލަށް އާސަންދަ ދިނުން މެދުކަނޑާލީ ފައިސާ ފަހުން ދޭ ގޮތަށް ކްރެޑިޓަށް ހިދުމަތް ނުދޭތީވެ ކަމަށެވެ.

އަސްޓަ ސީއެމްއައިއަ ހޮސްޕިޓަލުން ދޭ ހިދުމަތްތަކުގެ އަގުތައް ބޮޑުކަމަށާއި ސައިޓް ކެއާ ހޮސްޕިޓަލަކީ ވަރަށް ފަހުން އާސަންދަ ދޫކުރަން ފެށި ހޮސްޕިޓަލެއް ކަމަށް ޒީނިއާ ވަނީ ވިދާޅުވެފައެވެ.

ޖެނުއަރީ 2022 އިން ފެށިގެން މި އަހަރުގެ ޖޫން މަހުގެ ނިޔަލަށް އާސަންދައިން އެސްޓަ ސީއެމްއައި ހޮސްޕިޓަލަށް 7,780,674ރ (ހަތް ލައްކަ ހަތްސަތޭކަ އަށްޑިހަ ހާސް ހަ ސަތޭކަ ހަތްދިހަ ހަތަރު ރުފިޔާ) ވަނީ ހަރަދުކޮށްފައިއެވެ.

އެ ދެ ހޮސްޕިޓަލަށް އާސަންދަ ދިނުން މެދުކަނޑާލާފައިވާއިރު މިދިޔަ ޖުލައި މަހުގެ ތެރޭގައި ގިނަ އަދަދެއްގެ ދިވެހިން ފަރުވާ ހޯދުމަށް ގޮސް އުޅޭ މަނިޕާލް ހޮސްޕިޓަލުން ވެސް އާސަންދަ ދިނުން ވަނީ މެދުކަނޑާލާފަ އެވެ.

އެކަމާ ގުޅިގެން އެންސްޕާއިން ބުނީ މަނިޕާލް ހޮސްޕިޓަލުން ހިދުމަތް ފޯރުކޮށްދޭ އަގުތައް ބޮޑުވުން ކަމަށާއި ހިދުމަތްތަކުގެ އަގު ހެޔޮކުރަން ސަރުކާރުން މަޝްވަރާކުރަމުންދާ ކަމަށެވެ.