ޚަރަދު ކުޑަކުރުމުގައި ނުކުޅެދި، ގޮތް ހުސްވެ ވަޑައިގެން، ސަރުކާރުގެ ގިނަ ކުންފުނިތަކެއް އެއްކޮށްލުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.

މިކަން ހާމަކުރައްވާފައިވަނީ މިއަދުގެ ވަޒީރުންގެ މަޖިލީހުގެ ކުރިން ރައީސް މުއިއްޒު މީޑިޔާއަށް ދޫކުރެއްވި ވީޑިއޯ ކްލިޕެއްގައެވެ.

އެ ވީޑިއޯ ކްލިޕުގައި އެމަނިކުފާނު ވިދާޅުވެފައިވަނީ، މޯލްޑިވްސް އެއާޕޯޓްސް ކޮމްޕެނީގެ ދަށަށް ރީޖަނަލް އެއާޕޯޓްސް ގެނައުމާއި، ހައުސިން ޑިވެލޮޕްމަންޓް ކޯޕަރޭޝަން ދަށަށް ފަހި ދިރިއުޅުން ކޯޕަރޭޝަން ގެނައުމަށް ވަޒީރުންގެ މަޖިލީހުގައި މިއަދު މަޝްވަރާ ކުރާނެ ކަމަށެވެ.

މީގެ އިތުރުން މޯލްޑިވްސް ފަންޑް މެނޭޖްމަންޓް ކޯޕަރޭޝަން އާއި ބިޒްނަސް ސެންޓާ ކޯޕަރޭޝަން އެކީގައި މަސައްކަތް ކުރެވޭނެ ގޮތެއް ހޯދަން ވެސް ކެބިނެޓުގައި މިއަދު މަޝްވަރާ ކުރާނެ ކަމަށް ރައީސް މުއިއްޒު ވިދާޅުވިއެވެ.

ހަމަ އެއާއެކު އެޗްޑީސީއާއި ފަހި ދިރިއުޅުން ކޯޕަރޭޝަން ދެ ކުންފުނި މާރޖް ކުރުން ނުވަތަ އެޗްޑީސީގެ ދަށުން ހިންގާ ސަބްސިޑަރީއަކަށް އެފްޑީސީ ހެދުމާ ގުޅޭ ގޮތުން ވެސް މަޝްވަރާ ކުރާނެކަން ވެސް ހާމަކުރެއްވިއެވެ.

ރައީސް މުއިއްޒު ވިދާޅުވީ ދުނިޔޭގެ އެކި ގައުމުތަކުގައި އިގްތިސާދު ޑައިވާސިފައި ކުރުމަށް ކުރިއަށް ގެންދާ އިންވެސްޓާ ރެސިޑެންސީ ޕްރޮގްރާމެއް ރާއްޖޭގައި ތައާރަފް ކުރުމާ ގުޅޭ ގޮތުން ވެސް ކެބިނެޓުގައި މަޝްވަރާ ކުރުމަށް ހަމަޖެހިފައިވާ ކަމަށެވެ.

ސަރުކާރުގެ ޚަރަދުތައް އިންތިހާއަށް ބޮޑުވެފައިވާއިރު ދަރަނި ބޮޑުވެ އެ ދަރަނި ނުދެއްކިދާނެކަމުގެ ހިރާސް ވަނީ ބޮޑުވެފައެވެ. އަދި އެކަމުގެ ސަބަބުން ރާއްޖޭގެ ރޭޓިން ތިން މަސް ދުވަހުގެ ތެރޭގައި ފިޗުން ވަނީ ދަށްކޮށްފައެވެ.

ސަރުކާރުން މިދިޔަ ހަފްތާގައި ވަނީ އެސްޓީއޯގެ ދަށަށް ފެނަކަ ކޯޕަރޭޝަން އަންނަ އަހަރުން ފެށިގެން ބަދަލު ކުރަން ނިންމާ، އެކަމުގެ މަސައްކަތްތައް ފަށާފައެވެ.

އެއް މަސައްކަތެއް ކުރާ ކުންފުނިތައް އެއްކޮށްލުމަކީ އިންޓަނޭޝަނަލް މަނިޓަރީ ފަންޑު (އައިއެމްއެފް) އާއި ވޯލްޑް ބޭންކުން ވެސް ލަފާދީފައިވާ ކަމެކަށްވާއިރު ސިޔާސީ މަގާމުތައް މަދު ކުރުމަށްވެސް ލަފާދީފައިވެއެވެ. ނަމަވެސް ސިޔާސީ މަގާމުތައް މަދުކުރުމަށް ސަރުކާރުން އަދި އެއްވެސް ފިޔަވަޅެއް ނާޅައެވެ. ދާދި ފަހުންވެސް ވަނި ސިޔާސީ މަގާމުތަކަކަށް ބޭފުޅުން އައްޔަންވެސް ކޮށްފައެވެ.