ރައީސް ޑރ. މުހައްމަދު މުއިއްޒުގެ ސަރުކާރުން ގެންދަނީ ދޮގުން ރެކެން ވެސް ދޮގު ހެދުން އިސްކުރަމުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ދަ ފްރޮންޓު އޮފީހުގައި ކުރިއަށްދާ ޖަލްސާގައި ވާހަކަފުޅު ދައްކަަވަމުންނެވެ.

ރައީސް ޔާމީން ވިދާޅުވީ، ރައީސް މުއިއްޒަކީ ރިޔާސީ އިންތިހާބުގެ ދުވަސްވަރު ރައްޔިތުންނަށް ވައުދުތަކުގެ ފުންޏެއް ވެވަޑައިގެންނެވި ބޭފުޅެއް ކަމަށާ ނަމަވެސް ވެރިކަން ލިބިވަޑައިގެންނެވުުން އެ ވައުދުތަކުގެ ހަނދާން ނެތިއްޖެ ކަމަށެވެ.

މީގެ އިތުރުން މި ފަހަކަށް އައިސް ގައުމުގެ ހާލަތާ އަދި ސަރުކާރުން ކުރަމުން ގެންދާ އެކި އެކި ޏޭދެވޭ ކަންކަމުގެ ދިފާއުގައި ރައީސް މުއިއްޒު އިތުރުފުޅު ހައްދަވަމުން ގެންދާވާ ކަމާ އަދި އެފަދަ ކަންކަމުގެ ދިފާއުގައި ސަރުކާރުގެ ވެރިންނާ އަދި މަޖިލިސް މެމްބަރުން މެދުވެރިކޮށް ވެސް މީސް މީޑިޔާގެ އެކި މަންސަތަކުގައިވެސް ލިޔުއްވާކަމަށެވެ.

ރައީސް ޔާމީން އިތުރަށް ވިދާޅުވީ، މި ސަރުކާރުގައި ތެދަށް ވުރެ ދޮގު އިތުރު ކަމަށާ އެއާ އެކު ރައްޔިތުންގެ އިތުބާރު ގެއްލިފައިކަމަށެވެ. އަދި ސިޔާސީ މީހުން ދެކެ ރައްޔިތުން ފޫހިވަނީ ފޫހިވާން ޖެހިގެންކަން ރައީސް މުއިއްޒު ވިދާޅުވާ ފަދައިން ހާމަވާ ކަމަށް ރައީސް ޔާމީން ވިދާޅުވިއެވެ.