އާދަމް އަތުހަރު,32 މަރުވީ ފުލުހުން އަނިޔާ ކުރުމުގެ ސަބަބުން ނޫން ކަމަށާއި، އޭނާ މަރުވީ އަމިއްލައަށް ދަންޖެހިގެން ކަމަށް ހޯމްލޭންޑް އެންޑް ސެކިޔުރިޓީ މިނިސްޓްރީން ސާބިތުކޮށްދީފިއެވެ.

ނޫސްވެރިންނަށް އެކަން ސާބުތުކޮށްދިނީ ރިކޯޑުކުރެވޭ ފަދަ އެއްވެސްއެއްޗެއް ވެއްދުން މަނާކޮށް ރޭ އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައެވެ.

އެ ބައްދަލުވުމުގައި ފުލުހުން ވަނީ އަތުހަރު ހުރި ޖަލު ގޮޅީގެ ސީސީޓީވީ ފޫޓޭޖް ދައްކާފައެވެ.

އެ ފޫޓޭޖުން ފެންނަނީ އަތުހަރު އަމިއްލައަށް މަރުވުމަށް އޭނާ ހުރި ޖަލުގެ ކުޑަ ދޮރުގެ ތޭރިތަކުގައި ސޯޓުގައި ހުރި ނާޑުވާ އޮޅައި އެ ނާޑުވާ ކަރުގައި އައްސައިގެން އޮށޯންނަ މަންޒަރެވެ.

އޭގެ 30 މިނެޓް ފަހުން ފުލުހުން އެ ގޮޅިއަށް އައިސް އޭނާގެ ކަރުގައި އައްސާފަ އޮތް ނާޑުވާ ނައްޓައި އޭނާއަށް ފަރުވާދޭން ގެންދާ މަންޒަރު ފެނެއެވެ.

އަތުހަރު ދަންޖެހުނު މައްސަލަ އަންނަނީ ފުލުހުންގެ ތެރެއިންނާ, އެޗްއާރްސީއެމް އިންނާ ނޭޝަނަލް އިންޓެގެރެޓީ ކޮމިޝަން (އެންއައިސީ) އިން މިހާރު ބަލަމުންނެވެ.

ހޯމް މިނިސްޓަރު އަލީ އިޙްސާން ވިދާޅުވީ، އެ ފޫޓޭޖް ނޫސްވެރިންނަށް ދެއްކީ، ސޯޝަލް މީޑީޔާގައި ދެކެވޭ ވާހަކަތަކުގައި ފުލުހުން އަތުހަރުއަށް އަނިޔާ ކުރި ކަމުގައި ބުނާތީ، އަތުހަރުގެ މަރުގެ މައްސަލައިގައި ފުލުހުންގެ އިހުމާލެއް ނެތްކަން އެންގުމަށްކަމަށެވެ.

ފުލުހުން މިހާރު ވަނީ އެ ފޫޓޭޖް އަތުހަރުގެ އާއިލާއަށް ވެސް ދައްކާފައެވެ.

ފުލުހުން އިތުރަށް ބުނީ ހަށިގަނޑު ޕޯސްޓްމޯޓަމް ހެދުމަށް ގެންގޮސްފައިވާކަމަށެވެ.