ރައީސް މުހައްމަދު މުއިއްޒުގެ ސަރުކާރުން އެމަނިކުފާނާ މެދު ކަންކަންކުރައްވަމުން ގެންދަވަނީ ރައީސް އިބްރާހިމު މުހައްމަދު ސޯލިހުގެ ސަރުކާރާ ވުރެ އިތުރަށް އަނިޔާވެރިކަމާ އެކު ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ، ރޭ ދަ ފްރޮންޓު އޮފީހުގައި ބޭއްވި ޖަލްސާގައި ވާހަަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، އެމަނިކުފާނާ މެދު އިހްސާންތެރި ސަރުކާރަކަށް މި ސަރުކާރު ނުވާކަން އެމްއެމް ޕީއާރުސިގެ މައްސަލަތަކުގައި އަލުން ދައުވާކޮށް މައްސަލަތައް ކޯޓުގައި ހިންގަން ފެށުމުން އެކަނިވެސް ހާމަވާ ކަމަށެވެ.

އެގޮތުން އެމަނިކުފާނުވަނީ ހަމަ ކުރީ ސަރުކާރެކޭ އެއް ގޮތަށް މި ސަރުކާރުންވެސް ދައުވާތައް ކޮށް މައްސަލަަތައް ބަލަނީ އެމަނިކުފާނާ ދެކޮޅަށް އެކަނިކަން ފާހަގަކުރައްވާފައެވެ. އަދި މަޖިލީހުގެ ބިއުރޯގެ ޗީފު، އަހުމަދު ނިހާންގެ މައްސަލަ އަނބުރާ ގެންދިޔައިރު، އެމަނިކުފާނުގެ މައްޗަށް އަނެއްކާވެސް ޝަރީއަތްތައް ހިންގަން ފެށުމުން ވެސް މި ސަރުކާރުގައި އިހުސާންތެރިކަމެއް އެމަނިކުފާނާ މެދު ނެތްކަން ހާމަވާ ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން ވަނީ މީގެ ކުރިން އެމަނިކުފާނަށް ކުރީ ނުހައްގު ހުކުމެއްކަމަށް އަޑު އުފުލި މީހުން މިއަދު އަނގައިގެ ބަސް ހުސްވީތޯ އައްސަވާ ސުވާލުކުރައްވާފައެވެ.