ސަލްމާން މިސްކިތުގައި ދިގުރާގަށް ޤުރުއާން ކިޔެވުމުން ފަށައިފިއެވެ.
މަޤާމާތުލް ޤުރްއަނިއްޔާ"ގެ ނަމުގައި ފެށި މި މެހެފިލް އަކީ ކޮންމެ ހުކުރު ދުވަހެއްގެ ރޭ ސަލްމާން މިސްކިތުގައި ކުރިއަށް ގެންދިއުމަށް ހަމަޖެހިފައިވާ ޕްރޮގުރާމެކެވެ.
މި ޕްރޮގުރާމް ފެއްޓުމަށް ރޭ ކުރިއަށް ގެންދިޔަ ފުރަތަމަ މަހެފިލްގައި ގިނަ އަދަދެއްގެ ކުދިން ވަނީ ބައިވެރިވެފައި އެވެ. މި ޕްރޮގުރާމަކީ ޤުރުއާން ކިޔަވަން ލޯބި ޖެއްސުމާއި ފެންވަރު ރަނގަޅު ޤާރީން ބިނާކުރުމަށް މަގު ފަހިކުރުމުގެ މަޤުސަދުގައި އިސްލާމީ ކަންތައްތަކާއި ބެހޭ ވުޒާރާއިން ފެށި ހަރަކާތެކެވެ.
މި ޕްރޮގުރާމާއި ގުޅޭ ގޮތުން ވަޒީރު ޑރ މުހައްމަދު ޝަހީމް އަލީ ސައީދު ވިދާޅުވީ، މި ޕްރޮގުރާމުގެ ތެރެއިން ކުޅަދާނަ ޒުވާން މޮޅު ޤާރީން މި ތިލާވަތު މަހެފިލްގައި ފެނިގެންދާނެކަމަށެވެ.
ކީރިތި ޤުރުއާނުގެ ދާއިރާ ކުރިއެރުވުމަށް މި ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ޤުރުއާނާއި ބެހޭ ޤައުމީ މަރުކަޒަށް ޙާއްސަ އާ އިމާރާތެއް ހުޅުމާލޭގައި ޤާއިމްކުރުމަށް ވަނީ ނިންމާފައެވެ.
