އައު ޕްރޮސެކިއުޓާރ ޖެނެރަލް (ޕީޖީ) އައްޔަން ކުރަން ބުދަ ދުވަހު ދައުރުން ބޭރުން ޖަލްސާއެއް ބާއްވަން ތައްޔާރުވެއްޖެއެވެ.
ޕްރޮސިކިއުޓާ ޖެނެރަލް (ޕީޖީ) ހުސެއިން ޝަމީމް މަގާމުން ވަކި ކުރަން ފެންނަ ކަމަށް ރައްޔިތުންގެ މަޖިލީހުން ފާސް ކުރީ އޮގަސްޓް 22 ގައެވެ. އޭނާ މަގާމުން ވަކި ކުރުމުގެ ކުރިން އޭނާ ވަނީ މަގާމުން އިސްތިއުފާ ދެއްވާފައެވެ.
ގާނޫނުގައިވާ ގޮތުން 30 ދުވަހުގެ ތެރޭގައި އައު ޕީޖީ އައްޔަން ކުރަން ޖެހެއެވެ.
އެހެން ނަމަވެސް މަޖިލީސް ޗުއްޓީގައި އޮތުމުން ޖެހޭނީ ދައުރުން ބޭރުން ޖަލްސާއެއް ބާއްވާށެވެ.
ރައީސް އޮފީހުން ޕީޖީގެ މަގާމަށް ސެޕްޓެމްބަރު 11 ގެ ކުރިން ކުރިމަތިލުމަށް ހުޅުވާލައިފައި ވެއެވެ.
ޕީޖީ ކަމަށް ކުރިމަތިލައްވާ ބޭފުޅުންގެ ނަންތައް ރައީސް ތަރުތީބުކުރެއްވުމަށް ފަހު މަޖިލީހަށް ފޮނުއްވުމުން، މަގާމަށް ބޭފުޅަކު އައްޔަން ކުރާއްވާނީ މަޖިލީހުން ރުހުން ދިނުމުންނެވެ.
