ރައީސް ޑރ. މުހައްމަދު މުއިއްޒުގެ ޕްރިންސިޕަލް އެޑްވައިޒާ އޮން ޓްރޭޑް އެންޑް އިންވެސްޓްމަންޓު, މުހައްމަދު އަލީ ޖަނާހު އަށް ހުޅުމާލޭ ސަރަހައްދުން އެއްލައްކަ އަކަފޫޓުގެ ބޮޑު ބިމެއް ދީފައި އެވަނީ ކޮން އުސޫލަކުންތޯ އައްސަވާ ރައީސް އަބްދުﷲ ޔާމީން އަބްދުލްގައްޔޫމްގެ ވަރުގަދަ ސުވާލެއް އަމާޒުކުރައްވައިފި އެވެ.

ރައީސް ޔާމީން މިފަދައިން ވިދާޅުވެފައި ވަނީ ހޯމަ ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ޥާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ އެޔަކީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ނުވަތަ އާރބަންކޯ ނުވަތަ އަމިއްލަ މީހެއްގެ ތަނެއް ނޫން ކަމަށެވެ. ބިން ދިނުމުގައި އުސޫލްތަކެއް އޮންނާނެ ކަމަށާއި ހަމައެގޮތައް މާލޭގައި ވެސް ބިން އެހެން ކަނޑާފައި ނުދެވޭނެ ކަމަށް ރައީސް ޔާމީން ވިދާޅުވިއެވެ.

މިހާރު އެހެން ދޭކަމަށް ވާނަމަ ޓެންޑަރަށް ލައިގެން އުޅޭނީ ކީއްކުރަންތޯ ސުވާލު އުފައްދަވާ ރައީސް ޔާމިން ވިދާޅުވީ. ރައީސް މުއިއްޒުގެ ހުރިހާ ކަމެއްގެ ތެރޭގައި އުޅެނީ ޖަނާހް ކަމަށެވެ.

ޖަނާހުއަށް ބިން ދީފައި ވަނީ މި ސަރުކާރުގައި ކަމަށް ބުނެ މީސްމީޑިޔާގައި އަޑުފެތުރުމާއެކު އޭނާއަށް ބިން ދީފާއި ވަނީ ކުރީގެ ރައީސް އިބްރާހީމް މުހައްމަދު ޞާލިހްގެ ވެރިކަމުގައި ކަމަށް މި ސަރުކާރު ދިފާއު ކުރާ ފަރާތްތައް އަންނަނީ ބުނަމުންނެވެ. މި ވާހަކައަށް އިޝާރަތްކުރައްވާ ރައީސް ޔާމީން ވިދާޅުވީ ބިން ދީފާއި އޮތީ އިބްރާހިމް މުހައްމަދު ޞާލީހޭ ބުނަންޏާ އެއީ ގޯސްކަމަކަށް ވީމައެވެ. އެއީ ގޯސްކަމަކަށްވަންޏާ އެންމެ ފުރަތަމަ ކުރަންޖެހޭނެކަމަކީ އެ ބިން އޭނާގެ އަތުން އަތުލުން ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ މިހާރު ހުޅުމާލޭއިން މީހަކަށް ގެޔެއް އަޅަން އެއްހާސް އަކަފޫޓް ވެސް ލިބެން ދަތިކަމަށެވެ. މިގޮތައް މިކަން އޮންނަ އިރު އެންމެ މީހަކާ އެހާ ބޮޑު ބިމެއް ހަވާލު އެކުރީ އޭނާއަށް އެ ހެދުނު ދުވަހަކުން ހަދަން ކަމަށާއި އެތަން ހެދޭނެ ދުވަހެއް ދެނެވޮޑިގެންވާނީ މާތް ﷲ ކަމަށް ވެސް ރައީސް ޔާމީން ވިދާޅުވި އެވެ.

އޭގެއިތުރުން ރައީސް ޔާމީން ވިދާޅުވީ އެމަނިކުފާނު ހުޅުމާލޭ ފޭސް އެކެއް އަދި ޔޫތް ސިޓީ ހަދާފައި އެޔޮތީ ވަކި ވަކިން މީހުންނަށް ބިން ކަފާފައި ދޭކަށެެްް ނޫންކަމަށެވެ. އެމަނިކުފާނު ޔޫތް ސިޓީ ހެދީ އެޔަށްވުރެ އޯގަނައިޒްޑް، އެޔަށްވުރެ މޮޑާން، އަދި އެޔަށްވުރެ ރީތި،.ހިތްގައިމު ސިޓީއެއްްގެ ގޮތުގައި ކަމަށެވެ.

ޖަނާހް އަށް ހުޅުމާލެއިން އެއް ލައްކަ އަކަފޫޓުގެ ބޮޑު ބިމެއް ދިނުމުން އެކަން އެއީ ކޮންމެ ސަރުކާރަކުން ކުރި ނަމަވެސް ބަލައިގަނެވޭނެ ކަމެއްް ނޫންކަމަށް ވިދާޅުވެ ރައީސް ޔާމީން ވަނީ ވަރަށް ބޮޑަށް ފާޑުކިޔުން އަމާޒުކުރައްވާފައެވެ.