މަޖިލިސް ރައީސް އަދުރޭ ވަރެއް ނެތި ބަޔަކު އުޅުނުނަމަވެސް އެއީ އެއްވެސް އަގެއް ނެތް މީހެއް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ހޯމަ ދުވަހުގެ ރޭ ފްރޮންޓް އޮފީހުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، މާޒީގައި ކަންކަން ހިނގާފައިވާ ގޮތް ރައްޔިތުންނަށް އެނގެން ޖެހޭ ކަމަށާ އެގޮތުން "ގަބުރު ކޮނެގެން ކަށިނަގާ ހިސާބަށް" ދިއުމުން ރައްޔިތުންނަށް ހަގީގަތް ކިޔައިދޭން ޖެހޭ ކަމަށެވެ.

އެގޮތުން ރައީސް ޔާމީން ވިދާޅުވީ، މާޒީގައި ކަން ހިނގާފައިވާ ގޮތް އަދުރޭމެންގެ ދޮގު ދޫތަކުން ރައްޔިތުންނަށް އޮޅުވާލަމުން ގެންދާ ކަމަށާ އެގޮތުން 2018 ގެ ރިޔާސީ އިންތިހާބުގައި އަދުރޭ ހުރީ ރައީސް ޔާމީންއާ އެކު ކަމަށް ދެއްކި ނަމަވެސް އަދުރޭ ހުރީ ޖޭޕީގެ ކެންޑިޑޭޓު ގާސިމް އިބްރާހިމު އަ އެކު ކަމަށެވެ.

2013 ގެ ރިޔާސީ އިންތިޚާބުގެ ފުރަތަމަ ބުރުގައި ވަރަށް ބޮޑު ތަފާތަކުން ކުރީގައި އޮންނެވި ކަމަށާއި، ދެވަނަ އަށް އެމަނިކުފާނު ކަމަށާއި ދެން ގާސިމް ކަމަށާއި ހަތަރު ވަނަ އަށް ރައީސް ވަހީދު ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، އަދުރޭ އެ ވާހަކަ ދެއްކީ ދޮގު ނުކުރެވޭނެ ވަރު މީހެއް ކަައިރީ ކަމަށާ އެހެންކަމުން އެއިން ވެސް އަދުރޭގެ ނިޔަތް އޭރުވެސް ސާފު ނޫން ކަން ހާމަވާ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، އަދުރޭއަށް މި ސަރުކާރުގެ މަގާމުތަކުގެ ދެބައި ކުޅަ އެެއްބައި މަގާމުތައް ރައީސް މުހައްމަދު ވެދުމަށް އަރުވާފައިވާ ކަމަށާ އެއީ ރައީސް މުއިއްޒުގެ ނުކުޅެދުންތެރިކަމުން ކުރެއްވި ކަމެއް ކަމަށެވެ.

ރައީސް ޔާމީން ވިދާޅުވީ އަދުރޭއަކީ އެސެޓެއް ގޮތުގައި ބައެއް މީހުން ދެކުނު ނަމަވެސް އެއީ އަގެއް ނެތް މީހެއް ކަމަށެވެ.

ރައީސް ޔާމީން ވިދާޅުވީ، އަދުރޭއަކީ އިޚްލާސްތެރި ކަމާއެކީ އެއްވެސް ސިޔާސީ ވެރިއެއްގެ ފަހަތުގައި ހުންނެވި ބޭފުޅެއް ނޫން ކަމަށެވެ. އެގޮތުން ރައީސް މައުމޫނު އަރިހުގައި ވެސް އަދުރޭ މަސައްކަތްކުރީ ހީލަތްތެރި ކަމާއެކު ކަމަށް ރައީސް ޔާމީން ވިދާޅުވިއެވެ.