ރައްޔިތުންގެ ބޭންކް، ބޭންކް އޮފް މޯލްޑިވްސް (ބީއެމްއެލް) ގެ ކާޑުތަކުގެ ލިމިޓަށް ބަދަލު ގެންނަން އެ ބޭންކުގެ ބޯޑުން ނިންމި ނިންމުމަކީ ގެންނަން އުޅުނު މާލީ ބަޣާވާތެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެ އެކަމުގެ ތަހުގީގު ފެށުނު ފަހުން 15 ދުވަސް ވެގެން ދިޔައިރު، އެއްވެސް މީހެއްގެ މައްޗަށް ތުހުމަތުކުރެވިފައި ނުވާކަން ހާމަވެއްޖެ އެވެ.

ބޭންކުން ބަޣާވާތަކުން ސަރުކާރު ވައްޓާލަން އުޅުނު ކަމަށް ތުހުމަތުކޮށް އެ މައްސަލަ ތަހުގީގުކުރާކަން ފުލުހުން ހާމަކުރީ އޯގަސްޓު 26 ވީ ހޯމަ ދުވަހުގެ ރޭ އެވެ.

އެކަން ފުލުހުން އިއުލާނު ކުރީ ރައީސް މުއިއްޒު ބައިވެރިވެވަޑައިގެންނެވި ޕީއެންސީގެ ޖަލްސާގައި އެ ވާހަކަ ދައްކަމުން ދިޔަ ވަގުތުގައި އެވެ.

ރައީސް މުއިއްޒުގެ ވާހަކަތަކުން ހާމަވެގެންދިޔައީ މި ބަޣާވާތެއް ކުރަން އުޅުނީ އިދިކޮޅު އެމްޑީޕީ އާއި ބީއެމްއެލް ގުޅިގެންކަމެވެ.

އެހެން ނަމަވެސް ޖިނާއީ ބޮޑު ތުހުމަތެއް ކޮށްފައިވާއިރު ބީއެމްއެލްގެ އެއްވެސް ވެރިޔަކާ އަދި އެމްޑީޕީގެ ވެރިޔަކާ މިހާތަނަށް ސުވާލެއްގެ މިންވަރު ވެސް ކޮށްފައި ނުވެއެވެ.