ރައްޔިތުންގެ މަޖިލީހުގެ ޕީއެންސީ މެމްބަރުންނަށް ރައީސް މުއިއްޒުގެ ފަރާތުން ދެމުން އަންނަ ބައި ލައްކަ ރުފިޔާ ނުދޭކަމަށް ބުނެ ސަރުކާރުގެ އިސް ތަރުޖަމާނު ހީނާ ވަލީދު ލައްވާ އިތުރުފުޅު ހެއްދެވުމުން، ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ފާޑުވިދާޅުވެއްޖެ އެވެ.

ޑރ ޖަމީލް މިފަދައިން ވިދާޅުވެފައި ވަނީ ހީނާ އެކްސްގައި ކުރެއްވި ޕޯސްޓް ހިއްސާ ކުރެއްވުމަށްފަހު އެވެ.

މެމްބަރުންނަށް ރައީސް މުއިއްޒުގެ ފަރާތުން ބައި ލައްކަ ނުދޭކަމަށާއި އެކަމަކީ ރައީސުލްޖުމްހޫރިއްޔާ އަށް ނިސްބަތްކޮށް ފިތުނަ އުފެއްދުމުގެ ބޭނުމުގައި ދައްކަވާ ވާހަކައެއް ކަމަށް ތަރުޖަމާނު ހީނާ ވިދާޅުވުމުން، އެ ވާހަކަައަށް ރައްދު ދެއްވަމުން ޑރ ޖަމީލް ވިދާޅުވީ ހީވަނީ ރައީސުލްޖުމްހޫރިއްޔާއޭ ބުނީމަ މިއީ ހަތް އުނޑުމަތިން ފައިބާވަޑައިގެން ހުންނެވި ބޭކަލެއްހެން ކަމަށެވެ.

އޭގެއިތުރުން ޑރ ޖަމީލް ވިދާޅުވީ މި ދައްކަނީ ދިވެހި ރައްޔިތުން ލޯ ކުރިމަތީ އިންސާނަކު އަނެއް އިންސާނަކަށް ދޭނެ އެންމެ ނުބައި ލަނޑުދީފައި، މަކަރު ހަދައިފައި ހުރި މީހެއްގެ ވާހަކަ ކަމަށެވެ. ޑރ ޖަމީލް އިޝާރާތް ކުރެއްުވީ ރައީސް އަބްދުﷲ ޔާމީންގެ ހުސްގޮނޑި އާއި އެމަނިކުފާނުގެ ފޮޓޯ ދައްކައިގެން ވެރިކަމަށް އައުމަށްފަހު އެމަނިކުފާނަށް ދޯކާ ދިން ވާހަކައަށެވެ.

ޑރ ޖަމީލް ވިދާޅުވީ ދޮގު ހެދުމާއި މަކަރު ހެދުމަކީ ރައީސް މުއިއްޒަށް އައު ކަމެއް ނޫންކަމަށެވެ. އަދި ހީނާ ރައީސް މުއިއްޒު ދިފާއު ކުރައްވާ އެހާ ބޮޑު ދޮގެއް ހެދުމުން ޑރ ޖަމީލް ވަނީ މިމީހުން މަޙްޝަރު ދުވަހު ވެސް ދޭނީ ދޮގުތަކަށް މިފަދަ ޖަވާބުތޯ އައްސަވާ ސުވާލެއް އަމާޒުކުރައްވާފައެވެ.