އެމަނިކުފަނު މިނިވަންވީ ކޯޓުގެ ތެރެއިން ކަމަށާއި އެމަނިކުފާނު މިނިވަން ކުރުމުގައި އަދުގެ ރައީސް މުހައްމަދު މުއިއްޒުގެ އަތެއް އެއްވެސް ވަރަކަށް ނޯންނާނެ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދަޅުވެފައި ވަނީ ހޯމަ ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަ ދައްކަވަމުންނެވެ.

އެގޮތުން އެމަނިކުފާނު ވިދާޅުވީ ރައީސް ޔާމީން މިނިވަންވީ ރައީސް މުއިއްޒުގެ ސަބަބުން ކަމަށް ގިނަ ފަރާތްތަކުން ބުނާތީ އެކަން ހިނގައި ދިޔައީ އެގޮތައް ނޫން ކަމަށެވެ. އެގޮތުން ރައީސް ޔާމީން މިނިވަން ވެވަޑައިގަތީ ކޯޓުގެ މަރުހަލާއިން ކަމަށާއި މިނިވަންވުމުގައި ރައީސް މުއިއްޒުގެ އަތެއް ނޯންނާނެ ކަމަށް ފާހަގަކުރެއްވި އެވެ.

މިނިވަން ކުރުމުގެ ބަދަލުގައި އަދުގެ ސަރުކާރުގެ ވެރިން ކުރި ކަމަކީ ޝަރީއަތް ލަސް ކުރުމާއި ޕީޖީގެ ވަކީލުން އަޑުއެހުންތަކަށް ހާޒިރު ނުވުމަށް އެންގުން ކަމަށް ވިދާޅުވެ ރައީސް ޔާމީން ވަނީ ފާޑުކިޔުން އަމާޒުކުރައްވާފައެވެ.

އޭގެއިތުރުން އެމަނިކުފާނު ވިދާޅުވީ ދައުލަތުގެ ވަކީލުން މަހެއް ވަންދެން އަޑުއެހުންތަކަށް ނައުމަށް އެދި ޕީޖީއަށް ގުޅީ އަދުގެ ސަރުކާރުގެ ވެރިންގެ ތެރެއިން ކާކުކަން އެމަނިކުފާނަށް އެނގިލައްވާކަމަށެވެ. ޕީޕިއެމް/ޕީއެންސީގެ ވެރިން އެގޮތައް ޝަރީއަތްތަކަށް ހުރަސް އަޅާ ލަސްކުރުމަށް އިދާރާތަކަށް ގޮސް އާދޭސް ކުރީ އެމަނިކުފާނުގެ ކެންޑިޑެސީ ގެއްލުވާލުމަށް ކަމަށް ވެސް ރައީސް ޔާމީން ވިދާޅުވިއެވެ.

ޝަރީއަތްތައް ލަސްކުރުމުގައި އުޅުއްވި ބޭފުޅުންގެ ވަނަވަރު އަދި ހާމަވެގެންދާނެ ކަމަށް ވެސް ރައީސް ޔާމީން ވިދާޅުވިއެވެ.