ދިވެހި ސަފރާތަކަށާ ބޭރު ގައުމުތަކުގައި ރާއްޖެ ތަމްސީލު ކުރައްވާ އެކި މަގާމުތަކަށްވެސް ފެންވަރު ނެތް ބޭފުޅުން އައްޔަންކުރައްވަމުން ގެންދަވާތީ ރައީސް އަބްދުﷲ ޔާމީންގެ ފާޑުކިޔުން ސަރުކާރަށް އަމާޒުކުރައްވައިފިއެވެ.

ސަރުކާރުން ކުރަމުން ގެންދާ އެފަދަ ކަންކަމަށް ރައިސް ޔާމީން ފާޑުވިދާޅުވެފައިވަނީ، ރޭ ދަ ފްރޮންޓް އޮފީހުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.

ރައީސް ޔާމީން ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވައުދުވެވަޑައިގެންނެވީ ރައްޔިތުން ސިއްސައިގެންދާވަރުގެ ގާބިލު ކެބިނެޓެއް އެކުލަވައިލައްވަން ކަމަށެވެ.

އެގޮތުން އިލްމީ ގޮތުންނާއި އަމަލީ ގޮތުންވެސް ގާބިލު ކަމަށް އެކަށީގެންވާ ބޭފުޅުންގެ މައްޗަށް އެކުލެވޭ ކެބިނެޓެއް އެކުލަވައިލައްވާނެކަމަށް ވިދާޅުވި ނަމަވެސް ރައީސް މުއިއްޒުގެ ކެބިނެޓަކީ އެފަދަ ގާބިލު ކެބިނެޓެއް ނޫންކަން ރައީސް ޔާމީން ފާހަގަކުރެއްވިއެވެ.

މީގެ އިތުރުން ރާއްޖޭގެ ފަރާތުން ދުނިޔޭގެ ގައުމުތަކުގެ ކެރިއާ ޑިޕްލޮމެޓުންނާ މުއާމަލާތްކުރަން އެމްބަސީތަކަށް ފޮނުވާ ސިޔާސީ ބޭފުޅުންގެ ތެރޭގައި ވަރަށް ގިނައިން ތިއްބެވީ "ކުނިބުނި"ކަމަށް ވިދާޅުވެ އެކަމާމެދު ކަންބޮޑުވެވަޑައިގަންނަވާކަން ރައީސް ޔާމީން ހާމަކުރެއްވިއެވެ.

ޔާމީން ވިދާޅުވި ގޮތުގައި އިއްޔެ އޭލެވެލްއިން މަތީ ފާސް ހޯދި ދަރިވަރުންނަށް އިނާމު ދިނުމަށް ބޭއްވި ރަސްމިއްޔާތުގެ ކުރީ ސަފުގައި ކެބިނެޓުގެ ވަޒީރުން ތިއްބެވިއިރު އޭގެ ތެރޭގައި ރަނގަޅަށް އިނގިރޭސިބަހުން ވާހަކަދައްކަވަން އެނގިވަޑައިނުގަންނަވާ ބޭފުޅުން ތިއްބެވިއެވެ.

ޕާޓީތަކަށް ފާޑުވިދާޅުވެ ރައީސް ޔާމީން ފާހަގަކުރެއްވީ ޕާޓީތަކުގެ ފަރާތުން ދައުލަތުގެ މުހިއްމު ޒިންމާދާރު މަގާމުތަކަށް ކުރިމަތިލައްވާ ވަރަށް ގިނަ ބޭފުޅުންނަކީ އެ މަގާމުތަކަށް އެކަށީގެންވާ ތައުލީމާއި ތަޖުރިބާ ލިބިވަޑައިގެންފައިވާ ބޭފުޅުންނަށް ނުވާކަމެވެ.

މި ސަރުކާރުގެ ކެބިނެޓުގައި ރަނގަޅު ބޭފުޅުން ތިއްބެވި ނަމަވެސް ކެބިނެޓުގައި ތިއްބެވި ބައެއް ބޭފުޅުންނަކީ އިނގިރޭސިބަހުން ވާހަކަދައްކަވަން އެނގިވަޑައިނުގަންނަވާ ބޭފުޅުންކަމަށާއި، އެއިން ބައެއް ބޭފުޅުން ވާހަކަފުޅުދެއްކެވުމުން ދިވެހިރާއްޖެއަށް ކުރިމަތިވަނީ ލަދުވެތިކަން ކަމުގައި ޔާމީން ވިދާޅުވިއެވެ.