މި ސަރުކާރުގެ ގްރީން ސިގްނަލަކީ ރައްޔިތުންނަށް ރެޑް ސިގްނަލެއް ކަމަށް މަރަދޫ ދާއިރާގެ މެންބަރު އަހުމަދު ދީދީ (ޑީޑީ) ވިދާޅުވެއްޖެ އެވެ.

އެމްޑީޕީގެ ހަރުގެ ޖަލްސާގައި ދީދީ ވިދާޅުވީ މި ސަރުކާރުން ގްރީން ސިގްނަލެއްގެ ވާހަކައެއް ދައްކައިފިނަމަ ރައްޔިތުން އެއަށް ސަމާލުވާން ޖެހޭ ކަމަށެވެ.

އޭނާ ވިދާޅުވީ މިއަދު ގައުމުގެ ވެރި މީހާގެ ހާލަތަކީ މުލިއާގޭ މަތިން ބޮޑު ކޮތަރު ބައިގަނޑެއް ދިޔަޔަސް، އެއީ ސިހުރެއް ނުވަތަ ބަގާވާތެއް ކަމަށް ފެހި ސިގްނަލް ލިބޭ ކަމަށާއި އެކަން ތަހުގީގު ކުރަން ހޯމް މިނިސްޓަރަށް ވެސް ދަންނަވަން ޖެހޭ ކަމަށެވެ.

އޭގެއިތުރުން ރައީސް މުއިއްޒުއަށް ގައުމާ މެދު ވިސްނަން ވަގުތު ނުވެ، ހަމައެކަނި ވަގުތު ވަނީ ސިހުރަކުން ނުވަތަ ބަގާވާތަކުން ސަލާމަތްވުމަށް ކަމަށް ވިދާޅެވެ ދީދީ ފާޑުކިޔުން އަމާޒުކުރެއްވިއެވެ.

ދީދީ އިތުރަށް ވިދާޅުވީ ފަލަސްތީނުގެ ދިފާއުގައި ސަހްޔޫނީންގެ ޕާސްޕޯޓް ބޭންކުރަން ދެއްކި ވާހަކައާއެކު އަރަބި ގައުމުތަކުގެ ހެޑްލައިނަށް ރާއްޖެ އެރިއިރު މިއީ ދޮގު ހަދާ ސަރުކާރެއްކަން އެ މީހުންނަށް ނޭނގުނު ކަމަށެވެ.

ނަމަވެސް, މިހާރު އެ ބޭފުޅުންނަށް ވެސް މި ސަރުކާރަކީ ދޮގު ހަދާ ސަރުކާރެއްކަން ހާމަވެފައިވާ ކަމަށައި ޕާސްޕޯޓް ބޭން ނުކުރާނެކަން ވެސް އެނގޭ ކަމަށެވެ.