ޑިމޮކްރަސީގައި ނޫސްވެރިންނަށް ބިރުދައްކާ އެމީހުންގެ މަސައްކަތަށް ބުރޫ އަރާ ގޮތަށް މަސައްކަތް ކުރުމަކީ ބަލައިނުގަނެވޭނެ އަދި ވަރަށް ދަށު ދަރަޖައިގެ އަމަލެއް ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

ޖަމީލް އެކްސްގައި ކޮށްފައިވާ ޕޯސްޓެއްގައި މިފަދައިން ބުނެފައިވަނީ އަދަދު ނޫހުން ގެނެސްދިން "ބައިލައްކަ" ޑޮކިއުމެންޓްރީގައި ރައީސް މުއިއްޒު އާއި ގުޅޭގޮތުން ދޮގު ޚަބަރު ފަތުރާކަމުގެ ތުހުމަތުގައި އެ ޑޮކިއުމެންޓްރީގެ މައްސަލަ ރައީސް އޮފީހުން އެމްއެމްސީއަށް ހުށަހެޅުމާއި ގުޅިގެންނެވެ.

ރައީސް މުއިއްޒު ޕީއެންސީ ޖަގަހައިގައި ޒާތްޒާތުގެ ވާހަކަދައްކައި، ކުންފުނިތަކަށް ބަޣާވާތް ކުރާކަމަށް ގޮވާލަމުންދާތީ ރައީސްގެ ކޮންމެ އަމަލެއް އެކްސްޕޯސް ކުރުމަކީ ސިޔާސީ ފަރާތްތަކުގެ އިތުރުން ނޫސްވެރިންގެ ޒިންމާއެއް ކަމަށް ޖަމީލްގެ ޕޯސްޓްގައި ވަނީ ފާހަގަކޮށްފައެވެ.

ރައީސް ކަމަކީ ވަރަށް ކެރިގެން އަންނާނެ ފާޑުކިޔުންތަކަށް ކުރިމަތިލެވޭ ވަރުގެ މީހަކަށް ނޫނީ ކުރެވޭނެ ކަމެއް ނޫން ކަމަށާއި ކަމެއް ވާއިރަށް ކުޑަ ކުއްޖެއްހެން ރުއިން ދޫކޮށްލުމަށް ޖަމީލްވަނީ ރައީސް މުއިއްޒަށް ގޮވާލާފައެވެ.