ރައީސް އަބްދުﷲ ޔާމީން ފްރޭމުކޮށް އެމަނިކުފާނުގެ މައްޗަށް އާރަށުގެ މައްސަލައިގައި އުފުލި އަޑުއެހުން ދަށު ކޯޓު މަރުހަލާގައި މަޑު ޖައްސާލައިފިއެވެ.

ފަތުރުވެރިކަމަށް ވ. އާރަށް ކުއްޔަށް ދޫކުރުމުގައި ހިޔާނާތްވި ކަމަށް ބުނެ ރައީސް ޔާމީންގެ މައްޗަށް ދައުލަތުން އުފުލު ދައުވާގައި އެމަނިކުފާނުގެ މައްޗަށް ކުށް ސާބިތުވާ ކަމަށް ކަނޑައަޅާ ހުކުމް ކުރީ 2022 ޑިސެމްބަރު މަހުގެ 25 ވަނަ ދުވަހުއެވެ.

އޭގެ ފަހުން އެމަނިކުފާނުގެ ފަރާތްޕުޅުން އެ މައްސަލަ ދިވެހިރާއްޖޭގެ ހައިކޯޓުގައި އިސްތިއުނާފުކޮށް މައްސަލައިގެ ހުކުމް އިއްވީ 18 އެޕްރިލު 2024ގައެވެ. ހުކުމުގައި ހައިކޯޓުގެ ފަނޑިޔާރުންގެ ބެންޗުގެ އިއްތިފާގުން ވަނީ އެ މައްސަލަ އަލުން ބަލަން ކުރިމިނަލް ކޯޓަށް ތަހްވީލުކޮށްފައެވެ.

އެއާއެކު މި މައްސަލަ އަލުން ކުރިމިނަލް ކޯޓުގައި ފެށީ މިދިޔަ މަހުގެ 21 ވަނަ ދުވަހުއެވެ. އެ ދުވަހު މި މައްސަލައިގެ ހުރިހާ އަޑު އެހުމެއް ލައިވްކުރަން ރައީސް ޔާމީންގެ ފަރާތްޕުޅުން އެދިވަޑއިގެންނެވުމުން އެގޮތަށް އެކަން ވަނީ ނިންމަވާފައެވެ. އަދި އެ ދުވަހުގެ އަޑު އެހުމުގައި ދައުލަތުން ވަނީ ސުޕްރީމު ކޯޓުގައި އޮތް މައްސަލަ ރިޔާސަތުގެ ސަމާލުކަމަށް ގެނެސްފައި ނަމަވެސް ފަނޑިޔާރު އަލީ ނަދީމު ވަނީ މައްސަލަ ކުރިއަށް ގެންދަން އެ ދުވަހު ނިންމަވާފައެވެ.

އެއަށް ފަހު މިއަދު ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭ ގޮތުން ގޮތެއް ނިންމަން ބޭއްވި އަޑުއެހުމުގައި ރައީސް ޔާމީންގެ ފަރާތްޕުޅުން ވަނީ މި މައްސަލައިގައި ހިމެނޭ ހެކީގެ މައްސަލަ ސުޕްރީމް ކޯޓުގައި އޮއްވައި ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭ ގޮތުން ގޮތެއް ނިންމުމަކީ ފުށުއަރާ ކަމެއްގެ ގޮތުގައި ފާހަގަކުަރއްވާފައެވެ.

ޝަރީއަތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ތަހުގީގު މަރުހަލާގެ އޯޑިއޯއާއި ވީޑިއޯތަކާއި ލިޔެކިޔުންތައް ދިރާސާކުރަން ބޭނުންފުޅުވާ ކަމަށެވެ. އެހެންވެ، ޝަރީއަތުގެ ކުރިން ނިންމަންޖެހޭ ނިންމުންތަކާ ގުޅޭ ގޮތުން ގޮތެއް ނިންމުމުގެ ކުރިން އެ ފުރުސަތު ދޭންވާނެ ކަމަށް އެ މަނިކުފާނު ފާހަގަކުރެއްވިއެވެ.

ރައީސް ޔާމީންގެ ފަރާތްޕުޅުން ފާހަގަކުރެއްވި ކަންކަމަށް ފަހު ދަށު ކޯޓުގައި މި މައްސަލަ ބައްލަވާ ގާޒީ އަލީ ނަދީމް ވަނީ މިއަދުގެ އަޑުއެހުން ނިންމާލައިފައެވެ. މައްސަލައިގެ އަޑުއެހުމެއް ދެން ބާއްވާނީ މި މައްސަލައިގައި ހިމެނޭ ހެކީގެ މައްސަލަ ސުޕްރީމް ކޯޓުން ނިންމުމުން ކަމަށް ގާޒީ ވިދާޅުވިއެވެ. އަދި ތަހުގީގު މަރުހަލާގެ ވީޑިއޯތައްވެސް ރައީސް ޔާމީނަށް އަރުވާނެ ކަމަށްވެސް ވިދާޅުވިއެވެ.

އެހެންވެ، ސުޕްރީމް ކޯޓުން މި މައްސަލައިގައި ގޮތެއް ނިންމަން ދެން ދަށު ކޯޓުގެ ޝަރީއަތް ވަނީ މަޑުޖައްސާލައިފައެވެ.