ނުހައްގު ގޮތުގައި ކޯޓުތަކަށް އަތް ބޭނުން ހުއްޓުވާނެ ކަމަށް ބުނެ ވެރިކަމުގެ އާރާއި ބާރު ލިބުމުން ރައީސް މުއިއްޒު ފެއްޓެވީ އަނިޔާވެރިކަމުގެ އާ ސިލްސިލާއެއް ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

ރައީސް ޔާމީން އަށް ކޮށްފައިވާ ނުހައްގު ދައުވާގެ އަޑުއެހުމެއް މިއަދު ބޭއްވުމާއި ގުޅިގެން ޖަމީލްގެ އެކްސް އެކައުންޓްގައި ވަނީ މިކަމާއި ގުޅިގެން ހިތްހަމަނުޖެހުން ފާޅުކޮށް ޕޯސްޓްކޮށްފައެވެ.

މިގޮތުން، ނިމިދިޔަ އެމްޑީޕީ ވެރިކަމުގައި މުޅިންހެން ހޭދަކުރެވީ ސިޔާސީ ދައުވާއެއްގައި ޖަލުގައި ކަމަށާއި އެ ވެރިކަމަށް ރައްޔިތުން ނޫނެކޭ ބުނެ ރައީސް މުއިއްޒު ހޮވާފައިވަނީ އެފަދަ އަނިޔާވެރިކަމަށް މި ގައުމުން އިތުރު ފުރުސަތެއް ނުދޭންވެގެން ކަމަށް ޖަމީލް ފާހަގަކުރެއްވިއެވެ.

الله ތަޢާލާ ގަންދީ ކުރި ހުވަޔާ ޚިލާފުވެ، އެކަލާނގެ ބާއްވާލެއްވި ފޮތުގެ އިރުޝާދަށް ފުރަގަސް ދިނުމުގެ ނަތީޖާއަށް ބިރުވެތިވުމަށާއި ގައުމަށް ތި ވެވަޑައިގެންނެވީ ބޮޑު ޚިޔާނާތެއް ކަމަށް ޖަމީލްގެ ޕޯސްޓްގައި ވަނީ ވިދާޅުވެފައެވެ.