ލަންކާއިން އެތެރެކުރާ ޕެނަޑޯލް ބޭސް ގުޅަތަކެއް ފުނޑުފުނޑުވެފައި ހުރުމުގެ ސަބަބުން އެ ބޭސް ވިއްކުން ރާއްޖޭގައި ވަގުތީގޮތުން މަނާކޮށްފި އެވެ.

މޯލްޑިވްސް ފުޑްސް އެންޑް ޑްރަގް އޮތޯރިޓީން (އެފްޑީއޭ) ނެރުނު އިއުލާނެއްގައި ބުނީ އެ ނިންމުން ނިންމާފައި ވަނީ ރާއްޖެ އެތެރެކޮށް ވިއްކާ ޑޮކްޓަރީ ބޭހުގެ ރައްކާތެރިކަމާއި ފެންވަރު ކަށަވަރު ކުރުމަށް ހަދާފައިވާ "ޕޯސްޓް މާކެޓް ސާވައިލަންސް ޕްލޭން" ގެ ދަށުން ނެގި ރެންޑަމް ސާމްޕަލްތަކަކުން ދިވެހިން އާންމުކޮށް ބޭނުން ކުރާ ޕެނެޑޯލްގެ ބައެއް ގުޅަތައް ފުނޑުވެ، ބޭސްގުޅައިގެ ވަށައިގެން ތަންތަންކޮޅުން ނެޓިފައިވާކަން ފާހަގަވުމުން ކަމަށެވެ.

ރާއްޖެ އެތެެރެކޮށް، ފިހާރަތަކާއި ފާމަސީތަކުގެ އިތުރުން ގުދަންތަކުގައި ހުރި ޕެނެޑޯލްގެ ސްޓޮކް ވަކިކޮށް ބޭސް ރައްކާ ކުރުމަށް ކަނޑައަޅާފައިވާ ފިނިހޫނުމިނުގައި ބެހެއްޓުމަށް އެފްޑީއޭއިން ވަނީ އެދިފަ އެވެ.

އާންމުގޮތެއްގައި ބޭސްގުޅައަށް އެހެން ދިމާވަނީ ބޭސް އުފެއްދުމުގައި ނުވަތަ ބޭސް ރައްކާ ކުރުމުގައި ފުރިހަމަ ކުރަންޖެހޭ މިންގަނޑުތައް ފުރިހަމަ ނުކުރުމުން ކަމަށްވެސް އެ އިއުލާނުގައި ވަނީ ބުނެފައެވެ.

ޕެނެޑޯލް ބޭނުން ކުރުން އެފްޑީއޭއިން މަނާކުރި ނަމަވެސް، ޕެރެސެޓަމޯލް 500 މިލިގްރާމްގެ އިތުރު 11 ބްރޭންޑަކާއި ޕެރެސެޓެމޯލް 650 މިލިގްރާމްގެ ހަތް ބްރޭންޑެއް ބޭނުން ކުރުން ހުއްދަ ކަމަށް އެފްޑީއޭގެ އިއުލާނުގައި ހާމަކޮށްފައިވެއެވެ.