ނުހައްގު ހުކުމެއްކޮށް ހުރަގޭގައި ގިނިކަންޏާ ބެހެއްޓި ބެހެއްޓުމުގެ ބަދަލު އެއްވެސް ސަރުޚާރަކަށް ދެވޭނެތޯ އައްސަވާ ރައީސް އަބްދުﷲ ޔާމީން ސުވާލެއްކުރައްވައިފިއެވެ.

ރައީސް ޔާމީން މިފަދަ ސުވާލެއް ކުރެއްވީ ދަ ފްރޮންޓު އޮފީހުގައި ހޯމަ ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުންނެވެ.

ރައީސް ޔާމީންގެ ޝަރީއަތަކީ ސިޔާސީ ގޮތުން ނުފޫޒު ފޯރުވައިގެން އެމްޑީޕީ ސަރުކާރުން ކުރިއަށް ގެންދިޔަ ދައުވާތަކެއް ކަމަށް ރިޔާސީ އިންތިހާބުގެ ދުވަސްވަރުގައި ރައީސް މުހައްމަދު މުއިއްޒު ވަނީ ވިދާޅުވެފައެވެ. އަދި ސިޔާސީ ނުފޫޒު ފަނޑިޔާރު ގެތަކަށް ފޯރުވުމން ހުއްޓުވުނު ދުވަހަކުން މެނުވީ ރައީސް ޔާމީންގެ ޝަރީއަތްތައް ހުއްޓިގެންދާނެ ކަމަށް ރައީސް މުއިއްޒު ވިދާޅުވެފައިވެއެވެ. ނަމަވެސް އެމަނިކުފާނުގެ ސަރުކާރުގައި މިވަނީ އަލުން ރައީސް ޔާމީންގެ މައްޗަށް ދައުވާތަކެއް އުފުލާ މައްސަލަ ކުރިމިނަލް ކޯޓުގައި ފަށާފައެވެ.

މި ވާހަކަތައް ފާހަގަކުރައްވާ އަލްއުސްތާޛު އާދަމް އާސިފްވަނީ ރައީސް ޔާމީން އޭރު ވެސް ކުރެއްވީ ޖިހާދެއް ކަމަށާ އަބަދުވެސް އެމަނިކުފާނު ހުންނެވީ ސާބިތުކަމާ އެކުކަން ވެސް ފާހަގަކުރައްވާފައެވެ.

އެ ވާހަކަތަކަށް އިޝާރާތްކުރައްވާ ރައީސް ޔާމީން ވިދާޅުވީ، އެމަނިކުފާނު ކުރެއްވީ ޖިހާދެއް ނޫން ކަމަށާ އެމަނިކުފާނު ތަހައްމަލު ކުރެއްވީ އަނިޔާވެރިކަމާ ނާއިންސާފުވެރިކަން ކަމަށް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ އެފަދައިން ގިނިކަންޏާ ތަނެއްގައި ހުރުމުން މެނުވީ އެއީ ކިހާވަރެއްގެ ކަމެއްކަން އިހުސާސުކޮށްލަންވެސް ނޭނގޭނެ ކަމަށާ އެމަނިކުފާނު ބަންދުކޮށް ދިން ޖިސްމާނީ އަނިޔާއާ ނަފްސާނީ އަނިޔާގެ ބަދަލު އެމަނިކުފާނަށް އެއްވެސް ބަޔަކަށް ނުދެވޭނެ ކަމަށެވެ.

ރައީސް ޔާމީން މިފަދައިން ވިދާޅުވެފައިވާއިރު، އެމަނިކުފާނަށް ކުރިމިނަލް ކޯޓުން އާރަށުގެ މައްސަލައިގައި ކުރި ހުކުމާ ގުޅިގެން އެތައް ހައްގުތަކެއް ގެއްލިގެން ދިޔަކަން ފާހަގަކޮށްލެވެއެވެ. އެގޮތުން ނިމިދިޔަ ރިޔާސީ އިންތިހާބުގައި ޕީޕީއެމްގެ ރިޔާސީ ކެންޑިޑޭޓުގެ ގޮތުގައި އެ ޕާޓީގެ މެމްބަރުން ރިޔާސީ ޓިކެޓު ހަވާލުކޮށްފައި އޮތީ ރައީސް ޔާމީނަށް ކަމަށްވެފައި އެމަނިކުފާނަށް ކުރި ހުކުމާ އެކު އިސްތިުނާފު ލަސްކުރި ކުރުމުގެ ސަބަބުން އެމަނިކުފާނަށް ރިޔާސީ އިންތިހާބުގައި ވާދަކުރުމުގެ ފުރުސަތު ގެއްލި އެތައް ރައްޔިތުން ވޯޓުލާން ބޭނުންވި ކެންޑިޑޭޓަށް ވޯޓުލުމުގެ ހައްގަށްވެސް އުނިކަން އައިކަން ފާހަގަކޮށްލެވެއެވެ.