2023 ވަނަ އަހަރުގެ ރިޔާސީ އިންތިޚާބްގެ ކެމްޕެއިން ދުވަސްވަރު އަދުގެ ރައީސުލްޖުމްހޫރިއްޔާ ވެސް އަދި ސަރުކާރުގެ އެހެނިހެން ވެރިން ވެސް އުޅުއްވީ ރައްޔިތުންގެ ކުރިމަތީ ބޮޑެތި ވައުދުތައް ވުމުގައި އަވަދިނެތިއެވެ.

އެގޮތުން މި ގައުމުގައި ތިބި އިންޑިޔާގެ ސިފައިން ފޮނުވާލާނެ ކަމަށާއި ގެއްލުނު ކަނޑު އަނބުރާ ހޯދައިދޭނެ ކަމަށާއި އެމްޑީޕީ ސަރުކާރުގައި ރާއްޖެ އިގްތިޞާދީ ގޮތުން ވައްޓާލައިފައިވާ އަނދަވަޅުން ނަގާ ކޮޅަށް ޖައްސަވާނެކަމަށް ވައުދުތައްވީ ހިޔާލެއް ފިކުރެއް ނެތިއެވެ.

އާދެ، ވެރިކަމުގެ ކުރިން ވެރިންގެ ރާގު ހުރީ މިފަދައިން ނަމަވެސް ވެރިކަމަށް އައުމަށްފަހު މި ވަނީ ރާގު ބަދަލުވެފައެވެ. އެގޮތުން ރައްޔިތުންނަށް ވީ ވައުދުތަކުގެ މަތިން ހަނދާން ނެތިއްޖެއެވެ. ނޫނީ ގަސްތުގައި ހަނދާން ނައްތާލީއެވެ. ބަހާއި އަމަލު ދިމާނުކޮށް ފެއްޓެވީ ރައްޔިތުންނަށް މިއީ ވަރަށް ހީވާގި ސަރުކާރެއް ކަން ސާބިތުކޮށްދިނުމަށް މޮޅެތި ވީޑިޔޯތައް ކުޅެންށެވެ.

އެކަމުގައި އިސް ދައުރެއް މި އަދާކުރައްވަނީ ސީދާ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. އެގޮތުން އެމަނިކުފާނަކީ ފަތިސް ނަމާދުން ދުވަސް ފައްޓަވާ ވެރިޔެއްކަން ދެއްކުމަށް ވީޑިޔޯ އާންމުކުރިއެވެ.

އެމަނިކުފާނަކީ ހިތްތިރި ރައީސެއްކަން ދެއްކުމަށް މުލިއާގެއިން ހިނގާފައި ރައީސް އޮފީހަށް ދިޔަ މަންޒަރު ވެސް ވީޑިޔޯގެ ޒަރީއާއިން އާންމުކުރިއެވެ.

ދެން މިކަންކަން މިގޮތައް ހުރި އިރު ރައީސް އޮފީހުގެ ވެބްސައިޓުން ވެސް ރައީސް މީހާގެ ފިލްމު ކުޅޭ ވީޑިޔޯ އާންމުރެއެވެ.

ދެން ސަރުކާރުގެ ނައިބު ވަޒީރުންކޮޅެެއް މި ސަރުކާރުގެ އެންމެ ބޮޑު މަޝްރޫއުކަމަށް ދައުވާ ކުރާ ރަސްމާލެ ހިއްކާ ސަރަހައްދައް ގޮސް އެ ސަރަހައްދުގައި ވީޑިޔޯ ފިލްމެއް ކުޅިފައި އާންމު ކުރި މަންޒަރު ވެސް ފެނިގެންދިޔައެވެ.

ދެން އަދި ވަޒީރުންގެ ހާލު ވެސް ހުރީ ހަމަ މިފަދައިންނެވެ. އެކަކު އިނގިރޭސިން ވާހަކަ ދައްކަން ނޭނގުނަސް އެނގޭކަމަށް މޮޅެތި އިންޓަވިޔުތައް ދީފައި ވީޑިޔޯ އާންމުކުރި އިރު އަނެއްކަކު ފުޓް ބޯޅަ ކުޅިފައި ވުޒާރާގެ ޕޭޖުން އާންމުކުރިއެެވެ.

ސަރުކާރުގެ މަޖިލިސް މެމްބަރުންގެ ވާހަކަ ވެސް ރަނގަޅުވާނީ ހަމަ ނުދެއްކިއްޔާއެވެ. ދާއިރާގެ ރައްޔިތުންނަށް ހެޔޮ އެދޭކަމަށް ވީޑިޔޯއެއް ކުޅެމުން މީހުންނަށް އެހީތެރިވާ މަންޒަރުވެސް ފެނުނެވެ. މީހަކަށް ހެޔޮކޮށްދޭ ނަމަ އެކަމެއް ކޮންމެހެން މުޅި ދުނިޔެއަށް އިއުލާންކުރާކަށް ނުޖެހެއެވެ. އެ ވަރު ހަމަ މި ވެރިންނަށް ނޭނގެނީއެވެ.

ކަންކަން މިހެން ހުއްޓާ ދެން މި އިވިގެންދިޔައީ ރާއްޖެއާ ބެހޭ ފިލްމެއް ހަދަން ހޮލީވުޑާއެކު މަސައްކަތް ކުރަމުންދާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވި އަޑެވެ. އަޅުގަނޑު ގާތައް އައީ ހިންޏެވެ. ހިތައް ވެސް ބައިވަރު އެއްޗެހި އެރިއެވެ. އެގޮތުން މި ފިލްމްގެ ޓައިޓަލް އަކީ އަނެއްކާ "ފިނިފެންމަލުގެ ރާއްޖެ" ބާއެވެ. މި ސަރުކާރަކީ ހަމަ ފިލްމު ކުޅޭ ސަރުކާރެއްކަން މިހާރު ޔަގީންވެެއްޖެ އެވެ.

މިނިސްޓަރ ސައީދެވެ. ރާއްޖެ އަށް ފިލްމެއް ހެދުން ވެސް ރަނގަޅެވެ. އެހެންނަމަވެެސް ފިލްމަކަށްވުރެ ބޮޑަށް މި ވަގުތު ރައްޔިތުން ބޭނުމީ ތިޔަ ބޭފުޅުން ވެވަޑައިގެންނެވި ވައިދުތައް ފުއްދުމެވެ.