މާލީ ބަގާވާތް ކަމަށް ބުނެ ފުލުހުން ބަޔާން ނެރެ ތަހުގީގުކުރަން ފެށީ ބީއެމްއެލްގެ މައްސަލަައިގައި އަދި އެއްވެސް މީހަކާ ސުވާލުނުކުރާކަމަށް ފުލުހުން ހާމަކޮށްފިއެވެ.

އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު އެކަމާ ގުޅިގެން ސުވާލަކަށް ޖަވާބު ދެއްވަމުން ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ އެ މައްސަލައިގައި އެއްވެސް މީހަކާ ސުވާލުކޮށް ބަޔާން ނަގާފައި ނުވާނެ ކަމަށާއި މިވަގުތު ކުރަމުންދަނީ މައުލޫމާތު އެއްކުރުމުގެ މަސައްކަތް ކަމަށެވެ.

ބީއެމްއެލްގެ ޑެބިޓް ކާޑުގެ ޕްރައިމަރީ އެކައުންޓް ރުފިޔާ އެކައުންޓުގެ ގޮތުގައި ކަނޑައަޅާފައިވާ ނަމަ ރާއްޖެއިން ބޭރުގެ މުއާމަލާތް ކުރުމަށް އެއްވެސް އަދަދެއް ނުލިބޭ ގޮތަށް ބަދަލު ގެނައީ މިދިޔަ އޮގަސްޓް މަހުގެ ފަހުކޮޅެވެ.

ބީއެމްއެލް އިން އެކަން އިއުލާންކުރިތާ އަށް ގަޑިއިރު ވެސް ނުވަނީސް، އެ ބޭންކުން ވަނީ އެ ނިންމުން ބަދަލުކޮށް، ކުރިން އޮތް ގޮތަށް ހަމަޖައްސައިފިއެވެ. ބީއެމްއެލް އިން ނެރުނު ނޫސްބަޔާނުގައި ބުނީ އެ ނިންމުން އަނބުރާ ގެންދިޔައީ މަރުކަޒީ ބޭންކް އެމްއެމްއޭގެ ލަފާގެ މަތިން ކަމަށެވެ.

އެ ވަގުތާ ދިމާކޮށް އިދިކޮޅު އެމްޑީޕީއިން ނޫސްވެރިންގެ ބައްދަލުވުމެއް ބޭއްވިއެވެ.

ބީއެމްއެލް އާއި އެމްޑީޕީ ގުޅިގެން އޯގަސްޓު 25 ގައި ބަގާވާތަކުން ސަރުކާރު ވައްޓާލަން އުޅުނު ކަމަށް ތުހުމަތުކޮށް އެ މައްސަލަ ތަހުގީގުކުރާކަމަށް ބުނެ ފުލުހުން ބަޔާން ނެރުނެވެ. މިކަމަކީ ގާނޫނީ ސަރުކާރެއް ޣައިރު ގާނޫނީކޮށް ބަދަލުކޮށްލުމަށް ކުރެވިގެން ދިޔަ ކަމެއް ކަމަށް ބެލުމުގެ ޖާގަ އޮތުމުން ކަމަށް ބުނެއެވެ.

އޭގެ ފަހުން ބީއެމްއެލްގެ މެނޭޖިން ޑިރެކްޓަރު އަދި ސީއީއޯ ކާލް ސްޓުމަކް ރާއްޖޭން ބޭރުގައި ހުންނަވައި އިސްތިއުފާދެއްވާފައެވެ.

ސަރުކާރު ވައްޓާލަން އެ ބޭންކުގެ ތެރެއިން ހިންގަން އުޅުނު ސީދާ ބަޣާވާތެއް ކަމަށް ރައީސް ޑރ. މުއިއްޒު ވެސް ވަނީ ވިދާޅުވެފައިވަނިކޮށް ފުލުހުން ބަޔާން ނެރެ ތަހުގީގުކުރަން ފެށި މައްސަލައިގައި ތިން ހަފްތާވީއިރުވެސް އެއްވެސް މިހަކާ ސުވާލުނުކުރުމަކީ ކަމުގެ ބާވަތން ބަލާނަމަ އޮޅުވާލުންތަކެއް ހުރި ކަމެއްގެ ގޮތުގައި ބެލުމުގެ ފުރުސަތު އެބައޮތެވެ.