ސަހްޔޫނީންގެ އަސްކަރިއްޔާއިން ލުބުނާނުގެ އަވަށަކަށް ވައިގެ ހަމަލާތަކެއް ދީފިއެވެ. މި ހަމަލާތައް ދީފައިވަނީ އެ ގައުމުގައި ހަފުތާއެއްހާ ދުވަހު ދިން ނުރައްކާތެރި ހަމަލާތަކަށް ފަހު، ލުބުނާނުގައި ހަރަކާތްތެރިވާ ހަނގުރާމަވެރި ޖަމާއަތެއް ކަމަށްވާ ހިޒްބުاللهއާ ދެމެދު ގާތްގަނޑަކަށް އަހަރެއްހާ ދުވަސް ވަންދެން ހިނގަމުންދާ ހަނގުރާމަތައް ވަރުގަދަވެފައި ވަނިކޮށެވެ.
ލުބުނާނުގެ ސިއްހަތާ ބެހޭ އިދާރާތަކާ ހަވާލާދީ އެސޯސިއޭޓެޑް ޕްރެސް އިން ރިޕޯޓްކޮށްފައިވާ ގޮތުގައި މި ހަމަލާގައި ނުވަ މީހުން މަރުވެ، ގާތްގަނޑަކަށް 60 މީހުން ޒަހަމްވެފައިވެ އެވެ.
ސަހްޔޫނީންގެ އަސްކަރިއްޔާގެ ތަރުޖަމާނު އަވިޗޭ އަދުރައި ވިދާޅުވީ މި ހަމަލާގައި ހިޒްބުاللهގެ އެލީޓް ރަދުވާން ފޯސްގެ ވެރިޔާ އިބްރާހިމް އަކިލްގެ އިތުރުން ހިޒްބުاللهގެ އިސް އޮފިޝަލުންނަށް އަމާޒުކޮށް މަރާލާފައިވާ ކަމަށެވެ. ނަމަވެސް ހިޒްބުالله އިން ފާޅުގައި އެއްވެސް އެއްޗެއް ބުނެފައެއް ނުވެއެވެ.
މި ހަމަލާ ދީފައިވަނީ ލުބުނާން އިން ސަހްޔޫނީންގެ އުތުރުގެ ސަރަހައްދަށް 140 ރޮކެޓް ހަމަލާދީ، ދެ ގައުމުގެ ބޯޑަރު ހުރަސްކޮށް ދެ ފަރާތުން އެތައް މިސައިލެއްގެ ހަމަލާތައް ބަދަލުކުރި ފަހުންނެވެ.
