ދިވެހިރާއްޖޭގެ ކަނޑުގެ ބަނދަރު ތަރައްގީކުރުމަށް މާލިއްޔަތުގެ ފެންވަރު ނެތިގެން ވިއްކާލާކަށް ނުޖެހޭނެކަމަށް ރައީސް އަބްދުﷲ ޔާމީން އަބްދުލްއްގައްޔޫމް ވިދާޅުވެެއްޖެއެވެ.

ރައީސް ޔާމީން މިފަދައިން ވިދާޅުވެފައި ވަނީ ފްރޮންޓް އޮފީހުގައި ބުރާސްފަތި ދުވަހުގެ ރޭ ކުރިޔަށްދިޔަ ޖަލްސާގައި ވާހަކަފުޅު ދައްކަވަމުންނެވެ.

ސަރުކާރުން މަސައްކަތް ކުރަމުންގެންދަނީ ޕޯޓު ނުހިންގޭކަން ރައްޔިތުންނަށް ދެއްކުމަށް ކަމަށް ވިދަޅުވެ ރައީސް ޔާމީން ވަނީ ވަރަށް ބޮޑަށް ސަރުކާރަށް ފާޑުވިދާޅުވެފައެވެ. އެމަނިކުފާނު އިތުރަށް ވިދާޅުވީ ޕޯޓު ތަރައްގީކުރަން ރާއްޖޭގެ މާލިއްޔަތުން ޖާގަ ނުދޭކަމަށް ބުނެ ބޭރުގެ ބަޔަކަށް ޕޯޓު ވިއްކާލުމަކީ އެއްވެސް ހާލަތެއްގައި ބަލައިގަނެވޭނެ ވަރުގެ ކަމެއް ނޫންކަމަށެވެ.

ދިވެހިރާއްޖޭގެ މާލިއްޔަތުން ޕޯޓު ތަރައްގީ ކުރެވޭނެ ކަމަށް ފާހަގަކުރައްވާ ރައީސް ޔާމީން ވިދާޅުވީ ސަރުކާރުން އައު ޕޯޓެއް ހަދައި އާމްދަނީ އިތުރުކުރެވޭނެކަމަށް ބުނާ އެ ވާހަކަތަކަކީ އެއްވެސް ތާކުންތާކުން ނުޖެހޭ ފަދަ ވާހަކަތަކެއް ކަމަށެވެ.

ރައީސް ޔާމީން އިތުރަށް ވިދާޅުވީ މި ސަރުކާރުން ހިންގާ ކޮންމެ ޕްރޮޖެކްޓެއްގައި ވެސް "ކަޓު" ނަގާކަން ހާމަވާކަމަށެވެ. އެމަނިކުފާނު ވަނީ މި ސަރުކާރުން ރާއްޖޭގެ ކަނޑުގެ މައި ބަނދަރު ބޭރުގެ ކުންފުންޏަކަށް ދިނުމުގައި މަޝްވަރާތައް ކުރަމުން ގެންދާތީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.