ރައީސް މުހައްމަދު މުއިއްޒު ވެވަޑައިގެންނެވި ހުރިހާ ވައުދަކާ ޚިލާފުވެއްޖެ ކަމަށާ މި ސަރުކާރު ވެއްޓޭނެ ކަމަށް ރައްޔިތުންގެ މަޖަލީހުގެ އެމްޑީޕީގެ ޕީޖީ ލީޑަރު އިބްރާހިމު ނާޒިލް ވިދާޅުވެއްޖެއެވެ.

އެމްޑީޕީން ސިލްސިލާކޮށް ބާއްވަމުން އަންނަ ހަރުގެ ޖަލްސާތަކުގެ ތެރެއިން ރޭ ބޭއްވި ޖަލްސާގައި ވާހަކަދައްކަވަމުން ނާޒިލް ވިދާޅުވީ، މި ސަރުކާރުން ވެރިކަމަށް އަންނަންވެގެން ރައްޔިތުން ގާތުގައި ވީ ހުރިހާ ވައުދަކާ ހިލާފުވެފައިވާ ކަމަށެވެ.

އެގޮތުން އެކަންކަމުގެ ދިގު ލިސްޓެއް ހިއްސާކުރައްވާ ނާޒިލް ވިދާޅުވީ، އައްޑޫގައި މަސައްކަތްކުރާ ފެނަކަ ކުންފުނީގެ 100 އަށްވުރެ ގިނަ މުވައްޒަފުން ވަޒީފާއިން ވަކިކޮށްފައިވާ ކަމަށެވެ. އެކަމަކު، ވެރިކަމަށް އަންނަންވެގެން ރައީސް ޑރ. މުޙައްމަދު މުއިއްޒު ވިދާޅުވީ، އެއްވެސް މުވައްޒަފަކު ވަކިނުކުރާނެ ކަމަށް ކަމަށާއި އެ ވައުދާ ވެސް ހިލާފުވެފައިވާ ކަމަށް އޭނާ ވިދާޅުވިއެވެ.

މީގެ އިތުރުން މަސްވެރިންނަށް ދޭ ފައިސާ ކުޑަނުކުރާނަމޭ ވެސް ވިދާޅުވިކަމަށާ ނަމަވެސް ޔަގީނުން ވެސް އެ ފައިސާވެސް ކުޑަކޮށްފިކަމަށް ނާޒިލް ވިދާޅުވިއެވެ. އަދިވެސް ގިނަ ކަންކަން ނާޒިލް ފާހަގަކުރެއްވިއެވެ.

ޑޮލަރުގެ އަގު ވެސް ބޮޑުނުވާނެ ކަމަށް ރައީސް ވިދާޅުވިކަން ފާހަގަކުރައްވާ ނާޒިލް ވިދާޅުވީ، ޑޮލަރެއް މިހާރު ލިބެނީ 18.90 ރުފިޔާއަށް ކަމަށެވެ. އެއީ، ވެސް ހެއްދެވި އިތުރުފުޅެއް ގޮތުގައި ނާޒިލް ސިފަކުރެއްވިއެވެ.

އިދިކޮޅުގައި މި ސަރުކާރުގެ ބޭފުޅުން ތިބިއިރު ރާއްޖޭގައި ތިބި ކަމަށް ބުނި އިންޑިއާ ސިފައިން ފޮނުވާލުމަކީ މި ސަރުކާރުގެ އެންމެ ބޮޑު އެއް ވައުދު ކަމަށާއި އެކަމަކު، އޭރު އެ ތިބި ބަޔަކު އަދިވެސް މި ރާއްޖޭގައި އެބަތިބި ކަމަށް އޭނާ ތުހުމަތުކުރެއްވިއެވެ.