ވައިގެ މަގުން ރާއްޖެ އެތެރެކުރަން މަސައްކަތްކުރި 9 ކިލޯގެ މަސްތުވާތަކެތި އަތުލައިގެންފި އެވެ.

ކަސްޓަމްސްއިން ހާމަކޮށްފައިވާ ގޮތުގައި މިމަހުގެ 16 ވަނަ ދުވަހާއި 18 ވަނަ ދުވަހު ހިންގި އޮޕަރޭޝަންތަކެއްގައި ރާއްޖެއަށް ވައިގެ މަގުން އެތެރެކުރަން މަސައްކަތްކުރި މަސްތުވާތަކެތި ވަނީ އަތުލައިގެންފައެވެ.

އެގޮތުން މިމަހުގެ 16 ވަނަ ދުވަހު ހިންގި އޮޕަރޭޝަންގައި އަތުލައިގެންފައިވަނީ 349 ގްރާމުގެ ހެރޮއިންއެވެ.

އަދި 18 ވަނަ ދުވަހު ހިންގި އޮޕަރޭޝަނެއްގައި 582 ގްރާމްުގެ ސިންތެޓިކް ކެތިނޯން އަތުލައިގަތްއިރު ހަމަ އެދުވަހު ހިންގި އެހެން އޮޕަރޭޝަނެއްގައި 5210 ގްރާމުގެ ކެނަބިސް އާއި 2870 ގްރާމުގެ ޕާޓީ ޑްރަގް އަތުލައިގެންފައިވާ ކަން ކަސްޓަމްސްއިން ވަނީ ހާމަކޮށްފައެވެ.

ނަމަވެސް މި މައްސަލަތަކާއި ގުޅިގެން ބަޔަކު ހައްޔަރުކުރި ކަމެއް ހާމަކޮށްފައި ނުވެއެވެ. އަދި މިކަމާއި ގުޅިގެން ފުލުހުންވެސް އަދި މިހާތަނަށް ވަކި އެއްޗެކޭ ބުނެފައެއް ނުވެއެވެ.