ފަލަސްތީނުގެ ރައްޔިތުން ނައްތާލުމުން ދިވެހި ސަރުކާރުން ސަހްޔޫނީންގެ ޕާސްޕޯޓު މަނާކޮށްފާނެ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފަނު ވިދާޅުވީ ސަހްޔޫނީންގެ ޕާސްޕޯޓު މަނާ ނުކުރުމުގެ އުޒުރަކަށް މި ސަރުކާރުން ދައްކަނީ ރައްޔިތުންގެ މަޖިލީހުގެ އިޖުރާއަތު ކަމަށެވެ.

ނަމަވެސް އެ އިޖުރާއަތުތައް އޮއްވައި، ދައުރުން ބޭރުން ޖަލްސާއެއް ބާއްވައިގެން ކުންފުނީގެ ގާނޫނަށް ކުޑަ އިސްލާހެއް ގެނެއިކަން ރައީސް ޔާމީން ފާހަގަ ކުރެއްވި އެވެ.

އެގޮތުން ސަހްޔޫނީންގެ ޕާސްޕޯޓް މަނާނުކުރެވިގެން މިއުޅެނީ މަޖިލީހުގެ ކޮންފަދަ ބޮޑު އިޖުރާއަތްތަކެއް އޮންނާތީތޯ އައްސަވާ ރައީސް ޔާމީން ވަނީ ވަރުގަދަ ސުވާލެއް އަމާޒުކުރައްވާފައެވެ. ޕާސްޕޯޓް މަނާނުކޮށް ޕިޖަން ހޯލްކޮށްފައި އޮންނަތާ 4 މަސްވެއްޖެ ކަމަށް ފާހަގަކުރައްވާ ރައީސް ޔާމީން ވަނީ ކަންބޮޑުވުން ފާޅުކުރައްވާފައެވެ.

ދައުރުން ބޭރުން މަޖިލީހުގެ ފުރަތަަމަ ޖަލްސާ ބާއްވާ ޕްރޮސެކިޔުޓާ ޖެނެރަލްގެ މަގާމަށް ބޭފުޅަކު އައްޔަން ކުރެވުނުކަމަށާއި ދެވަނަ ޖަލްސާ ބާއްވާ ކުންފުނި ގާނޫނަށް އިސްލާހް ގެނެވުނުކަމަށް ފާހަގަކުރައްވާ އެމަނިކުފާނު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.