ސަރުކާރުން އައްޔަން ކޮށްފައިވާ ވަޒީރުންގެ ތެރެއިން ރައްޔިތުންގެ މަޖިލީހުން ރުހުން ނުލިބުނު ވަޒީރުން އަލުން މަގާމުތަކަށް އައްޔަންކޮށް ރުހުން ހޯދުމަށްޓަކައި އަލުން މަޖިލީހަށް ފޮނުވިގެންނުވާނެ ކަމަށް އެމްޑީޕީން ބުނެފިއެވެ.

އެމްޑީޕީގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެޕާޓީގެ ޕީޖީ ލީޑަރު، އަދި އަލިފުށީ ދާއިރާގެ މެމްބަރު، މުހައްމަދު ރަޝީދު (ބިގޭ) ވިދާޅުވީ، އެމްޑީޕީން ވިޕެއް ނެރެ، ރުހުން ނުދޭން ނިންމި ވަޒީރުން އަލުން އެ މަގާމުތަކަށް އައްޔަނުކޮށް ރުހުން ހޯދުމަށްޓަކައި އަލުން މަޖިލީހަށް ފޮނުވުމަށް ސަރުކާރުން މަސައްކަތް ކުރަމުން އަންނަކަމަށެވެ.

ޤާނޫނު މާނަކުރައްވަން ތިއްބަވާ ބޭފުޅުންނާއި މަޖިލިސްގެ އަމީން އާންމު، ފާތިމަތު ނިއުޝާގެ އިތުރުން މަޖިލިސްގެ ރައީސް، މުހައްމަދު އަސްލަމް މިކަމާއި ގުޅިގެން މަޝްވަރާ ކުރެއްވި ބައްދަލުވުމެއްގައި މުހައްމަދު ރަޝީދު ބައިވެރިވެފައިވާތީ އެކަން އެގޮތަށް ނުކުރެއްވޭނެކަން އެނގިލައްވާ ކަމަށް އޭނާ ވަނީ ބުނެފައެވެ.

އެބައްދަލުވުމުގައި ވަރަށް ސާފުކޮށް ކައުންސިލް ޖެނެރަލް، ރުހުން ނުލިބުނު ވަޒީރުންގެ ނަންތައް އަނބުރާ މަޖިލީހަށް ނުފޮނުވޭނެ ކަމަށް ވިދާޅުވި ކަމަށްވެސް އޭނާ ވަނީ ފާހަގަކުރައްވާފައެވެ.

އޭގެއިތުރުން ބިގޭ ވިދާޅުވީ، އެކަމާއި މެދު އެމްޑީޕީން ވަކި ގޮތަކަށް އަމަލު ކުރާނީ ޕާލަމެންޓްރީ ގްރޫޕުގެ މަޝްވަރާ ކުރުމަށްފަހު ކަމަށެވެ.