ނިމދިޔަ ފަސް އަހަރު މަގުމަތީގައި ތިބެ މުޒާހަރާ ކުރި ފަރާތްތައް މިއަދު ސަރުކާރުގައި ތިބެ އަނެއްކާ ދެން މަގުމައްޗަކަށް ނުނިކުމެވޭނެކަމަށް ބުނުމުން ރައީސް އަބްދުﷲ ޔާމީން އަބްދުލްގައްޔޫމް ވަރުގަދަ ރައްދެއް ދެއްވައިފި އެވެ.

ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ އިދިކޮޅުގައި އޮންނަވާ ވަކާލާތު ކުރި އެއްކަމެއް ވެސް ފުރިހަމަވެފައި ނުވާއިރު ހަމަގައިމުވެސް މިއަދު ސަރުކާރުގައި ތިބީ މަގުމަތީ އެކަންކަމާ އެންމެ ބޮޑަށް ވަކާލާތު ކުރި ފަރާތްތައްކަމަށެވެ. އެހެންކަމުން އެެއްވެސް ކަމެއް ބަދަލުނުވެ އޮންނަ އޮތުމަކީ ހަގީގަތުގައި ބަލައިގަންނަން ދަތި ކަމެއްކަމަށެވެ.

އޭރުވެސް މަގުމައްޗައް ނިކުމެ މަސައްކަތް ކުރީ ރައްޔިތުންގެ ހައްގުގައި ކަމަށްވާއިރު މިއަދު ވެރިކަމުގައި ތިބެ ރައްޔިތުންގެ ހައްގުގައި މަސައްކަތެއް ކުރަންވީމާ ފަހަތު ފަޔަށް ބުރަ ވަނީ ކީއްވެތޯ އެމަނިކުފާނު ވަނީ ސުވާލު އުފައްދަވާފައެވެ.

އޭގެއިތުރުން އޭރު މަގުމައްޗައް ނިކުމެ ވަކާލާތު ކުރީ ވިއްކާލި ކަނޑު އަނބުރާ ހޯދުމަށާ، ރާއްޖޭގައި ގާއިމްވެފައި ތިބި އިންޑިޔާގެ ސިފައިން ބޭރުކުރުމަށްކަމަށާ، އިންޑިޔާ އާއެކު ހަދާފައިވާ ގޮތް ނޭނގޭ އެއްބަސްވުންތައް ހާމަނުކޮށްގެން ކަމަށް ވާއިރު މިއަދު މިއިން އެއްވެސް ކަމެއް ފުރިހަމަވެފައި ނުވާތީ ރައީސް ޔާމީން ވަނީ ވަރަށް ބޮޑަށް ފާޑުވިދާޅުވެފައެވެ.