ރާއްޖޭގެ ކަނޑުގެ ބަނދަރު ބޭރުގެ ގައުމަކަށް ވިއްކާލަން އުޅޭތީވެ ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ފާޑުވިދާޅުވެއްޖެއެވެ.
ޑރ ޖަމީލް މިފަދައިން ވިދާޅުވެފައި ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަފުޅު ދައްކަވަމުންނެވެ.
އެގޮތުން އެމަނިކުފާނު ވިދާޅުވީ ޕޯޓު ތަރައްގީ ކުރުމަކި ދިވެހީންނަށް ވެސް ކުރެވޭނެ ކަމެއްކަމަށެވެ. ނަމަވެސް ސަރުކާރުން ވިސްނުން ގެންގުޅެނީ ދިވެހީންނަށް އެވަރުގެ ކަމެއް ނުކުރެވޭނެކަމަށެވެ. އެހެންކަމުން ފުރަތަމަ ކަމަކަށް ވެސް ސަރުކާރުން ވީ އެމީހުންގެ ވިސްނުން ބަދަލުކުރަން ކަމަށް ޑރ ޖަމީލް ވިދާޅުވިއެވެ.
ޑރ ޖަމީލް އިތުރަށް ވިދާޅުވީ މާލީ ގޮތުން އެކަން ނުކުރެެވޭނެ ކަމަށް ބުނެ ބޭރުގެ ގައުމަކަށް ދޭން އުޅޭއިރު އަނެއްކޮޅުން މިއުޅެނީ މި ރީޖިއަންގައި ވެސް ނެތް ފެންވަރަށް ހަދާފައި އޮތް ސީޕްލޭން ޓާމިނަލް އެހެންތަނަކަށް ބަދަލުކުރަންކަމަށެވެ. ސީޕްލޭން ޓާމިނަލް އެހެންތަނަކަށް ބަދަލު ކުރުމަކީ ވެސް އެހާވަރަށް ފައިސާ އެކަމަށް ދާނެކަމަކަށް ވާއިރު އެކަން ކުރަން ސަރުކާރުން ދައްކަނީ "މުނސަދި"ކަން ކަމަށް ވިދާޅުވެ ޑރ ޖަމީލް ވަނީ ވަރަށް ބޮޑަށް ފާޑުވިދާޅުވެފައެވެ.
އެމްޑީޕީގެ ވެރިކަން ބަދަލުކުރަން ކުރި އެންމެ ބޮޑު މަސައްކަތަކީ ރާއްޖޭގެ ސިޔާދަތު ހިފެހެއްޓުންކަމަށްވާއިރު އެ ވައުދު ވެވަޑައިގެންފައި ވެރިކަމަށް އައިސް އެކަންތައްތައް މަތިން ހަނދާން ނެތިގެން ރައީސް މުއިއްޒު އުޅުއްވާތީ ޑރ ޖަމީލް ވަނީ ރައީސް މުއިއްޒު ވެރިކަމަށް ވަޑައިގަތުމުގެ ކުރިން ދެއްކެވި ވާހަކަތައް ތަކުރާރުކުރައްވާފައެވެ.
ޑރ ޖަމީލްގެ އިތުރުން އެ ޖަލްސާގައި ބައިވެރިވެޑައިގަންނަވަމުން ރައީސް ޔާމީން ވެސް ވަނީ ރައީސް މުއިއްޒުގެ ސަރުކާރުން ކަނޑުގެ ބަނދަރު ވިއްކާލަން ނިންމާފައިވާތީ އެކަމާ ނުރުހުންފާޅުކުރައްވާފައެވެ.
