ވެރިކަން ކުރާ މައި ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އަށް މެމްބަރުން އިތުރު ކުރަން، ކުރަމުން ގެންދާ މަސައްކަތުގެ ތެރެއިން ފާއިތުވި ފަސް މަސް ދުވަހުން 2000 މެމްބަރުން ވެސް ދަފުތަރަށް އިތުރު ނުކުރެވުނުކަން އިލެކްޝަންސް ކޮމިޝަނުގެ ތަފާސްހިސާބުތަކުން ދައްކައިފިއެވެ.
މިކަން ހާމަވެފައި ވަނީ އިލެކްޝަންސް ކޮމިޝަނުން މިދިޔަ ހަފުތާގައި އަދާހަމަ ކުރި މައުލޫމާތުންނެވެ.
އެގޮތުން އެ މައުލޫމާތައް ބަލާއިރު މިމަހުގެ 19 ވަނަ ދުވަހާ ހަމައަށް ޕީއެންސީގެ ރަސްމީ ދަފުތަރުގައި ތިބީ 28،983 މެމްބަރުންނެވެ. މީގެ ފަސް މަސް ދުވަސް ކުރީގެ އަދަދުތަކަށް ބަލާއިރު މިދިޔަ އޭޕްރިލް 25، ގެ ނިޔަލަށް އެ ޕާޓީގައި ތިބި ޖުމުލަ މެމްބަރުންގެ އަދަދަކީ 27،704 ކަން ފާހަގަކޮށްލެވެއެވެ.
ޕީޕީއެމްގެ ކުލަޔާއި އެ ޕާޓީގެ އާންމު މެމްބަރުންގެ ތާއީދާއެކު ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވިއިރު ޕީއެންސީގެ މެމްބަރުންގެ އަދަދަކީ 3،159 އެެވެ. އެ ޕާޓީގެ ވަކި އޮފީހެއް ހަދައި މެމްބަރުން އިތުރު ކުރުމުގެ މަސައްކަތް ރައީސް މުއިއްޒު އަދި އަދުރޭ އިސްވެ ހުންނަވާ ފެށީ މިދިޔަ އަހަރުގެ ނޮވެމްބަރު 21 ގައެވެ.
ޕީއެންސީއަށް ޕީޕީއެމްގައި ތިއްބެވި މެމްބަރުން ވެއްދުމުގެ މަސައްކަތް އެބޭފުޅުން އަންގަވައިން ކުރަމުން އަންނަ ކަމުގެ މައުލޫމާތު "ތޭރައޮންލައިން" އަށް ވަނީ ލިބިފައެވެ.
އެ ވާހަކަތައް ޕީއެންސީގެ އިސްވެރިން އޭރު ދޮގު ކުރިނ ނަމަވެސް ރައީސް މުއިއްޒު އާއި މަޖިލިސް ރައީސް އަދުރޭ އަންގަވައިގެން ޕީޕީއެމް އުވާލުމުގެ މަސައްކަތް މިދިޔަ އޯގަސްޓު 1 ގައި ވަނީ ރަސްމީކޮށް ފަށާފައެވެ.